ḳhūbāñ jo pahante haiñ nipaT tañg choliyāñ
un kī sajoñ ko dekh mareñ kyuuñ na loliyāñ

hoñToñ meñ jam rahī hai tire aaj kyuuñ dharī
bhejī thiiñ kis ne raat ko pānoñ kī Dholiyāñ

jis din se añkhḌiyāñ tirī us ko nazar paḌīñ
bādām ne ḳhajil ho phir āñkheñ na kholiyāñ

taare nahīñ falak pe tumhāre nisār ko
laayā hai motiyoñ se ye bhar bhar ke jholiyāñ

sumbul ko pech-o-tāb ajab tarah kī huī
zulfeñ jab un ne jā ke gulistāñ meñ kholiyāñ

gulshan meñ bahsne ko tumhāre dahan ke saath
kholā thā muñh ko kaliyoñ ne par kuchh na boliyāñ

tābāñ qafas meñ aaj haiñ ve bulbuleñ ḳhamosh
kartī thiiñ kal jo baaġh meñ gul se kiloliyāñ

KHuban jo pahante hain nipaT tang choliyan
un ki sajon ko dekh maren kyun na loliyan

honTon mein jam rahi hai tere aaj kyun dhari
bheji thin kis ne raat ko panon ki Dholiyan

jis din se ankhDiyan teri us ko nazar paDin
baadam ne KHajil ho phir aankhen na kholiyan

tare nahin falak pe tumhaare nisar ko
laya hai motiyon se ye bhar bhar ke jholiyan

sumbul ko pech-o-tab ajab tarah ki hui
zulfen jab un ne ja ke gulistan mein kholiyan

gulshan mein bahsne ko tumhaare dahan ke sath
khola tha munh ko kaliyon ne par kuchh na boliyan

taban qafas mein aaj hain we bulbulen KHamosh
karti thin kal jo bagh mein gul se kiloliyan