Subscribe to our newsletter and get our newest updates

Baqar Naqvi

  • Ghazal


shor-e-dariya hai kahani meri


shor-e-dariyā hai kahānī merī
paanī is kā hai ravānī merī

kuchh ziyāda hī bhalī lagtī hai
mujh ko tasvīr purānī merī

jab bhī ubhrā tirā mahtāb-e-ḳhayāl
khil uThī raat kī raanī merī

baḌh ke siine se lagā letā huuñ
jaise har ġham ho nishānī merī

mehrbāñ mujh pe hai ik shāḳh-e-gulāb
kaise mahke na javānī merī

phir tire zikr kī sarsoñ phūlī
phir ġhazal ho ga.ī dhānī merī

kuchh to a.amāl bure the apne
kuchh sitāroñ ne na maanī merī

likhī jā.egī tire barf ke naam
jo tamannā huī paanī merī

tum ne jo bhī kahā maiñ ne maanā
tum ne ik baat na maanī merī

muḳhtasar baat thī jaldī bhī thī kuchh
is pe kuchh zūd-bayānī merī

shor-e-dariya hai kahani meri
pani is ka hai rawani meri

kuchh ziyaada hi bhali lagti hai
mujh ko taswir purani meri

jab bhi ubhra tera mahtab-e-KHayal
khil uThi raat ki rani meri

baDh ke sine se laga leta hun
jaise har gham ho nishani meri

mehrban mujh pe hai ek shaKH-e-gulab
kaise mahke na jawani meri

phir tere zikr ki sarson phuli
phir ghazal ho gai dhani meri

kuchh to aamal bure the apne
kuchh sitaron ne na mani meri

likhi jaegi tere barf ke nam
jo tamanna hui pani meri

tum ne jo bhi kaha main ne mana
tum ne ek baat na mani meri

muKHtasar baat thi jaldi bhi thi kuchh
is pe kuchh zud-bayani meri


Source: Book : Safeer-e-shar-e-dil (Pg. 435) Author : Hafeez Banarsi Publication : Hafeez Banarsi (2007) Edition : 2007

Leave a comment

+