choT khaa.ī ho jis ne ulfat kī
kyā kare baat vo masarrat kī

chaar din hañs ke umr bhar ronā
dāstāñ muḳhtasar hai ulfat kī

ek dhokā hai ḳhud-farebī hai
aarzū is jahāñ meñ rāhat kī

aadmī aadmī kā dushman hai
uf ye tazlīl ādamiyat kī

shoḳh aisā banā diyā tum ko
ye bhī san.at hai ik mashiyyat kī

kaash miT jaa.eñ kū-e-jānāñ meñ
ham ko ḳhvāhish nahīñ hai jannat kī

dil jalāne pe bhī na duur huī
tīrgī ai 'naresh' furqat kī

choT khai ho jis ne ulfat ki
kya kare baat wo masarrat ki

chaar din hans ke umr bhar rona
dastan muKHtasar hai ulfat ki

ek dhoka hai KHud-farebi hai
aarzu is jahan mein rahat ki

aadmi aadmi ka dushman hai
uf ye tazlil aadamiyat ki

shoKH aisa bana diya tum ko
ye bhi sanat hai ek mashiyyat ki

kash miT jaen ku-e-jaanan mein
hum ko KHwahish nahin hai jannat ki

dil jalane pe bhi na dur hui
tirgi ai 'naresh' furqat ki