ab kyā kaheñ kisī se ye apnī zabāñ se ham
be-zār ho chuke haiñ fareb-e-jahāñ se ham

nazzāra-e-jamāl kā aalam ajiib thā
mad.hosh o be-ḳhabar the vahāñ be-zabāñ se ham

ab hāl-e-iztirāb-e-tabī.at na pūchhiye
taḌpe haiñ umr bhar tire dard-e-nihāñ se ham

ye zor-e-barq-o-bād ye tūfān al-amāñ
mahrūm ho na jaa.eñ kahīñ āshiyāñ se ham

jin kī mahak se ruuh pe taarī hai be-ḳhudī
vo phuul chun rahe haiñ tire gulistāñ se ham

ta.amīr-e-nau hai parda-e-taḳhrīb meñ nihāñ
samjhe haiñ rāz-e-dahr ye daur-e-jahāñ se ham

manzil pe ho rahī haiñ qayāmat kī shorisheñ
ġhāfil paḌe hue haiñ magar kārvāñ se ham

nāseh! ḳhayāl-e-tark-e-mohabbat se fā.eda
vāqif nahīñ haiñ kyā alam-e-jāvedāñ se ham

ai 'naqsh' muḳhtasar ye haqīqat hai maut kī
phir aa ga.e vahīñ pe chale the jahāñ se ham

ab kya kahen kisi se ye apni zaban se hum
be-zar ho chuke hain fareb-e-jahan se hum

nazzara-e-jamal ka aalam ajib tha
madhosh o be-KHabar the wahan be-zaban se hum

ab haal-e-iztirab-e-tabiat na puchhiye
taDpe hain umr bhar tere dard-e-nihan se hum

ye zor-e-barq-o-baad ye tufan al-aman
mahrum ho na jaen kahin aashiyan se hum

jin ki mahak se ruh pe tari hai be-KHudi
wo phul chun rahe hain tere gulistan se hum

tamir-e-nau hai parda-e-taKHrib mein nihan
samjhe hain raaz-e-dahr ye daur-e-jahan se hum

manzil pe ho rahi hain qayamat ki shorishen
ghafil paDe hue hain magar karwan se hum

naseh! KHayal-e-tark-e-mohabbat se faeda
waqif nahin hain kya alam-e-jawedan se hum

ai 'naqsh' muKHtasar ye haqiqat hai maut ki
phir aa gae wahin pe chale the jahan se hum

Source: Book : Andaaz (Pg. 106) Author : Mahesh Chandr Naqsh Publication : Sangam Kitab Ghar,  Delhi (1962) Edition : 1962