Subscribe to our newsletter and get our newest updates

Mahesh Chandra Naqsh

  • Ghazal


muddat mein idhar phir wo gul-bar nazar aae


muddat meñ idhar phir vo gul-bār nazar aa.e
sahrā meñ bahāroñ ke āsār nazar aa.e

kyā rāz-e-mashiyyat thā ham ālam-e-hastī meñ
majbūr rahe lekin muḳhtār nazar aa.e

mastī-bharī āñkhoñ se jab us ne hameñ dekhā
masrūr nazar aa.e sarshār nazar aa.e

dekhe haiñ mohabbat ke ham ne ye karishme bhī
ik baar chhupe gar vo sau baar nazar aa.e

phir mast ghaTā chhā.ī phir paḌne lagīñ būñdeñ
phir jām-ba-kaf har-sū mai-ḳhvār nazar aa.e

mad.hosh fazāoñ meñ phir qaus-e-quzah damkī
phir qāmat-e-rañgīñ ke anvār nazar aa.e

un mast nigāhoñ ne ḳhud apnā bharam kholā
inkār ke parde meñ iqrār nazar aa.e

ham bāda-parastoñ ne chheḌī jo hadīs-e-mai
khulte hue duniyā ke asrār nazar aa.e

har ruuh meñ dekhī hai ai 'naqsh' ḳhalish ġham kī
har phuul ke pahlū meñ kuchh ḳhaar nazar aa.e

muddat mein idhar phir wo gul-bar nazar aae
sahra mein bahaaron ke aasar nazar aae

kya raaz-e-mashiyyat tha hum aalam-e-hasti mein
majbur rahe lekin muKHtar nazar aae

masti-bhari aankhon se jab us ne hamein dekha
masrur nazar aae sarshaar nazar aae

dekhe hain mohabbat ke hum ne ye karishme bhi
ek bar chhupe gar wo sau bar nazar aae

phir mast ghaTa chhai phir paDne lagin bunden
phir jam-ba-kaf har-su mai-KHwar nazar aae

madhosh fazaon mein phir qaus-e-quzah damki
phir qamat-e-rangin ke anwar nazar aae

un mast nigahon ne KHud apna bharam khola
inkar ke parde mein iqrar nazar aae

hum baada-paraston ne chheDi jo hadis-e-mai
khulte hue duniya ke asrar nazar aae

har ruh mein dekhi hai ai 'naqsh' KHalish gham ki
har phul ke pahlu mein kuchh KHar nazar aae


Source: Book : Andaaz (Pg. 74) Author : Mahesh Chandr Naqsh Publication : Sangam Kitab Ghar,  Delhi (1962) Edition : 1962

Leave a comment

+