Subscribe to our newsletter and get our newest updates

Abdul Aziz Khalid

  • Ghazal


qurb nas nas mein aag bharta hai


qurb nas nas meñ aag bhartā hai
vasl se iztirāb baḌhtā hai

maiñ faqat ek ḳhvāb thā terā
ḳhvāb ko kaun yaad rakhtā hai

aaj kī shab shab-e-qayāmat hai
dil mirā be-tarah dhaḌaktā hai

faqr kyā hai ba-dost pevastan
ġham kā irfāñ hai āgahī kyā hai

maiñ milātā huuñ sher-o-ātish ko
fan mujhe kīmiyā kā aatā hai

tosha-e-rāh-e-ishq hai andoh
ġham diloñ ko qarīb laatā hai

sher-e-tāza hai tohfa-e-shā.er
mushk-e-nāfa hiran ne uglā hai

qillat-e-kulfat-o-takalluf meñ
rāhat-e-qalb-e-nā-shakebā hai

aish-e-nā-pā.edār par nāzāñ
aadmī kitnā bholā-bhālā hai

jaan kā sarfa ho to ho lekin
sarf karne se ilm baḌhtā hai

kise pās-e-marātib-e-alfāz
hashr-e-ma.anī se qatl barpā hai

pā ke ġhāfil kahīñ na Das le tumheñ
Daro us se jo tum se Dartā hai

maqsad isbāt-e-zāt hai us se
kyā gale kā sabab bhī hotā hai

sachche taḳhlīq-kār kī mānind
ūñghtā hai ḳhudā na sotā hai

āb-o-rañg-e-hayāt hai us se
aarzū jāgtoñ kā sapnā hai

mere maulā-karīm ne mujh ko
ġhair-matbūa zehn baḳhshā hai

yuuñ lage jaise parda-e-sīmīñ
aañkh kyā ruuh kā darīcha hai

kis ne dekhā hai parda-e-zulmāt
dil ke bhedoñ ko kis ne paayā hai

kaun mar kar dobāra zinda huā
kaun mulk-e-fanā se lauTā hai

kar ke yaksar mujhe nazar-andāz
kis se dil ham-kalām rahtā hai

bāvajūd-e-fishār-e-shab hama-shab
husn har sub.h taaza hotā hai

har bun-e-mū banā hai parda-e-sāz
dil ke tāroñ ko kis ne chheḌā hai

baat abdul-azīz-'ḳhālid' kī
dāstān-e-amīr-hamza hai

qurb nas nas mein aag bharta hai
wasl se iztirab baDhta hai

main faqat ek KHwab tha tera
KHwab ko kaun yaad rakhta hai

aaj ki shab shab-e-qayamat hai
dil mera be-tarah dhaDakta hai

faqr kya hai ba-dost pewastan
gham ka irfan hai aagahi kya hai

main milata hun sher-o-atish ko
fan mujhe kimiya ka aata hai

tosha-e-rah-e-ishq hai andoh
gham dilon ko qarib lata hai

sher-e-taza hai tohfa-e-shaer
mushk-e-nafa hiran ne ugla hai

qillat-e-kulfat-o-takalluf mein
rahat-e-qalb-e-na-shakeba hai

aish-e-na-paedar par nazan
aadmi kitna bhola-bhaala hai

jaan ka sarfa ho to ho lekin
sarf karne se ilm baDhta hai

kise pas-e-maraatib-e-alfaz
hashr-e-mani se qatl barpa hai

pa ke ghafil kahin na Das le tumhein
Daro us se jo tum se Darta hai

maqsad isbaat-e-zat hai us se
kya gale ka sabab bhi hota hai

sachche taKHliq-kar ki manind
unghta hai KHuda na sota hai

aab-o-rang-e-hayat hai us se
aarzu jagton ka sapna hai

mere maula-karim ne mujh ko
ghair-matbua zehn baKHsha hai

yun lage jaise parda-e-simin
aankh kya ruh ka daricha hai

kis ne dekha hai parda-e-zulmat
dil ke bhedon ko kis ne paya hai

kaun mar kar dobara zinda hua
kaun mulk-e-fana se lauTa hai

kar ke yaksar mujhe nazar-andaz
kis se dil ham-kalam rahta hai

bawajud-e-fishaar-e-shab hama-shab
husn har subh taza hota hai

har bun-e-mu bana hai parda-e-saz
dil ke taron ko kis ne chheDa hai

baat abdul-aziz-'KHalid' ki
dastan-e-amir-hamza hai


Source: Mata-e-Noor

Leave a comment

+