zindagī kā banā sahārā bhī
aur un ke karam ne maarā bhī

ishq hī phir palaT ke aa na sakā
husn-e-maġhrūr ne pukārā bhī

kaun Duubā jo yuuñ pashemāñ hai
mauj-e-tūfāñ bhī tez dhārā bhī

ham na duniyā kī raah par chalte
dil ko hotā agar gavārā bhī

umr bhar tīrgī se khele hai
koī hañstā huā sitārā bhī

phuul rote haiñ ḳhaar hañste haiñ
dekh! gulshan kā ye nazārā bhī

dil kī duniyā to jagmagā uTThe
'naqsh' bhaḌke koī sharārā bhī

zindagi ka bana sahaara bhi
aur un ke karam ne mara bhi

ishq hi phir palaT ke aa na saka
husn-e-maghrur ne pukara bhi

kaun Duba jo yun pasheman hai
mauj-e-tufan bhi tez dhaara bhi

hum na duniya ki rah par chalte
dil ko hota agar gawara bhi

umr bhar tirgi se khele hai
koi hansta hua sitara bhi

phul rote hain KHar hanste hain
dekh! gulshan ka ye nazara bhi

dil ki duniya to jagmaga uTThe
'naqsh' bhaDke koi sharara bhi

Source: Book : Andaaz (Pg. 160) Author : Mahesh Chandr Naqsh Publication : Sangam Kitab Ghar,  Delhi (1962) Edition : 1962