Subscribe to our newsletter and get our newest updates

Kabeer Athar

  • Ghazal

kabhi firaq kabhi lazzat-e-visal mein rakh


kabhī firāq kabhī lazzat-e-visāl meñ rakh
mujh e'tidāl se aarī ko e'tidāl meñ rakh

nachā rahā hai mujhe uñgliyoñ pe ishq tirā
tamām umr isī raqs-e-be-misāl meñ rakh

dukhī ho dil to utartī hai shā.irī mujh par
tujhe ġhazal kī qasam hai mujhe malāl meñ rakh

tū chāhtā hai agar kār-e-āfatāb karūñ
mirā uruuj mirī sā.at-e-zavāl meñ rakh

tire baġhair guzārī hai zindagī maiñ ne
tū is sitam kī talāfī bhī māh-o-sāl meñ rakh

tū dil hai aur dhḌaknā tirī ibādat hai
so ḳhud ko jism se bāhar bhī tū dhamāl meñ rakh

shikam se ho ke guzarte haiñ qaul-o-fe.al mire
mujh aise shaḳhs ko nān-o-namak ke jaal meñ rakh

mire badan ko bhale is se aag lag jaa.e
charāġh-e-harf magar mere baal baal meñ rakh

maiñ is azaab ke nashshe meñ mubtalā huuñ 'kabīr'
parā.ī aag uThā kar mirī sifāl meñ rakh

kabhi firaq kabhi lazzat-e-visal mein rakh
mujh e'tidal se aari ko e'tidal mein rakh

nacha raha hai mujhe ungliyon pe ishq tera
tamam umr isi raqs-e-be-misal mein rakh

dukhi ho dil to utarti hai shairi mujh par
tujhe ghazal ki qasam hai mujhe malal mein rakh

tu chahta hai agar kar-e-afatab karun
mera uruj meri saat-e-zawal mein rakh

tere baghair guzari hai zindagi main ne
tu is sitam ki talafi bhi mah-o-sal mein rakh

tu dil hai aur dhDakna teri ibaadat hai
so KHud ko jism se bahar bhi tu dhamal mein rakh

shikam se ho ke guzarte hain qaul-o-feal mere
mujh aise shaKHs ko nan-o-namak ke jal mein rakh

mere badan ko bhale is se aag lag jae
charagh-e-harf magar mere baal baal mein rakh

main is azab ke nashshe mein mubtala hun 'kabir'
parai aag uTha kar meri sifal mein rakh


Source: Book : Safeer-e-shar-e-dil (Pg. 47) Author : Hafeez Banarsi Publication : Hafeez Banarsi (2007) Edition : 2007

Leave a comment

+