lagtā nahīñ kahīñ bhī mirā dil tire baġhair
donoñ jahāñ nahīñ mire qābil tire baġhair

kuchh lutf-e-zindagī nahīñ hāsil tire baġhair
pal bhar guzārnā bhī hai mushkil tire baġhair

tū hī nahīñ to kaun kare merī rahbarī
kaTtī nahīñ hayāt kī manzil tire baġhair

dil par mire hī shaaq nahīñ hai tirā firāq
ḳhāmosh haiñ chaman meñ anādil tire baġhair

phūloñ ke ibtisām pe aatī hai ab hañsī
aisā bujhā huā hai mirā dil tire baġhair

hosh-o-havās-o-aql-o-ḳhirad de ga.e javāb
yaanī nahīñ huuñ maiñ kisī qābil tire baġhair

har dam ye soch hai mire jiine se fā.eda
jab maqsad-e-hayāt hai bātil tire baġhair

takmīl-e-ārzū se hai takmīl-e-zindagī
kyūñkar ho zindagī mirī kāmil tire baġhair

kashtī nikal to aa.ī hai gardāb se magar
dil Dūbne lagā lab-e-sāhil tire baġhair

har dam taḌap ke loTtā phirtā huuñ ḳhaak par
goyā banā huuñ tā.ir-e-bismil tire baġhair

āñkheñ hī pahle rotī thiiñ ab to ye qahr hai
rone lagā hai ḳhuun mirā dil tire baġhair

'nādir' ko jaan dene se kyuuñ roktā hai tū
jiine se bhī hai kyā use hāsil tire baġhair

lagta nahin kahin bhi mera dil tere baghair
donon jahan nahin mere qabil tere baghair

kuchh lutf-e-zindagi nahin hasil tere baghair
pal bhar guzarna bhi hai mushkil tere baghair

tu hi nahin to kaun kare meri rahbari
kaTti nahin hayat ki manzil tere baghair

dil par mere hi shaq nahin hai tera firaq
KHamosh hain chaman mein anadil tere baghair

phulon ke ibtisam pe aati hai ab hansi
aisa bujha hua hai mera dil tere baghair

hosh-o-hawas-o-aql-o-KHirad de gae jawab
yani nahin hun main kisi qabil tere baghair

har dam ye soch hai mere jine se faeda
jab maqsad-e-hayat hai baatil tere baghair

takmil-e-arzu se hai takmil-e-zindagi
kyunkar ho zindagi meri kaamil tere baghair

kashti nikal to aai hai gardab se magar
dil Dubne laga lab-e-sahil tere baghair

har dam taDap ke loTta phirta hun KHak par
goya bana hun tair-e-bismil tere baghair

aankhen hi pahle roti thin ab to ye qahr hai
rone laga hai KHun mera dil tere baghair

'nadir' ko jaan dene se kyun rokta hai tu
jine se bhi hai kya use hasil tere baghair