Subscribe to our newsletter and get our newest updates

Wali Aasi

  • Ghazal


hum jo din-raat ye itr-e-dil-o-jaan khinchte hain


ham jo din-rāt ye itr-e-dil-o-jāñ khīñchte haiñ
naf.a kam karte haiñ ai yaar ziyāñ khīñchte haiñ

sochne ke liye mauzū-e-suḳhan koī nahīñ
sub.h se shaam talak sirf dhuāñ khīñchte haiñ

maiñ ne muddat se koī sach bhī nahīñ bolā hai
phir mujhe daar pe kyuuñ ahl-e-jahāñ khīñchte haiñ

ab bhī rahte haiñ bahut aise bahādur jo yahāñ
duudh piite hue bachchoñ pe kamāñ khīñchte haiñ

vo musāhib jo zabāñ kholte Darte the kabhī
ab vahī mere buzurgoñ kī zabāñ khīñchte haiñ

mere qātil mujhe pahchān ga.e haiñ shāyad
varna kyuuñ jism se yuuñ nok-e-sināñ khīñchte haiñ

rahguzāroñ kī havā kā to maiñ jāñdāda na thā
kyuuñ mirī na.ash ko galiyoñ meñ yahāñ khīñchte haiñ

hum jo din-raat ye itr-e-dil-o-jaan khinchte hain
nafa kam karte hain ai yar ziyan khinchte hain

sochne ke liye mauzu-e-suKHan koi nahin
subh se sham talak sirf dhuan khinchte hain

main ne muddat se koi sach bhi nahin bola hai
phir mujhe dar pe kyun ahl-e-jahan khinchte hain

ab bhi rahte hain bahut aise bahadur jo yahan
dudh pite hue bachchon pe kaman khinchte hain

wo musahib jo zaban kholte Darte the kabhi
ab wahi mere buzurgon ki zaban khinchte hain

mere qatil mujhe pahchan gae hain shayad
warna kyun jism se yun nok-e-sinan khinchte hain

rahguzaron ki hawa ka to main jaandada na tha
kyun meri nash ko galiyon mein yahan khinchte hain


Source: Book : ghazluyat-e-ehsaan daanish (Pg. 224)

Leave a comment

+