Subscribe to our newsletter and get our newest updates

Karamat Bukhari

  • Ghazal


dahakti KHwahishon mein jal raha hun


dahaktī ḳhvāhishoñ meñ jal rahā huuñ
kabhī qātil kabhī maqtal rahā huuñ

mirā pīchhā na kar ai zindagānī
maiñ rāh-e-raftagāñ pe chal rahā huuñ

maiñ aisā azhdahā huuñ ḳhvāhishoñ kā
ḳhud apnā ḳhuun pī kar pal rahā huuñ

rahā huuñ vāqif-e-rāz-e-haqīqat
ba-zāhir be-ḳhabar pāgal rahā huuñ

ridā-e-tishnagī oḌhe hue maiñ
samundar ke kināre chal rahā huuñ

gavāhī ke liye kaafī rahegā
maiñ apnā ḳhuun muñh pe mal rahā huuñ

koī bhūlā huā naġhma huuñ dil kā
vafā ke āñsuoñ meñ Dhal rahā huuñ

dahakti KHwahishon mein jal raha hun
kabhi qatil kabhi maqtal raha hun

mera pichha na kar ai zindagani
main rah-e-raftagan pe chal raha hun

main aisa azhdaha hun KHwahishon ka
KHud apna KHun pi kar pal raha hun

raha hun waqif-e-raaz-e-haqiqat
ba-zahir be-KHabar pagal raha hun

rida-e-tishnagi oDhe hue main
samundar ke kinare chal raha hun

gawahi ke liye kafi rahega
main apna KHun munh pe mal raha hun

koi bhula hua naghma hun dil ka
wafa ke aansuon mein Dhal raha hun


Issue No. 5-6"

Leave a comment

+