tū phuul kī mānind na shabnam kī tarah aa
ab ke kisī be-nām se mausam kī tarah aa

har martaba aatā hai mah-e-nau kī tarah tū
is baar zarā merī shab-e-ġham kī tarah aa

hal karne haiñ mujh ko ka.ī pechīda masā.il
ai jān-e-vafā gesu-e-pur-ḳham kī tarah aa

zaḳhmoñ ko gavārā nahīñ yak-rañgi-e-hālāt
nashtar kī tarah aa kabhī marham kī tarah aa

nazdīkī o duurī kī kashākash ko miTā de
is jañg meñ tū sulh ke parcham kī tarah aa

maanā ki mirā ghar tirī jannat to nahīñ hai
duniyā meñ mirī laġhzish-e-ādam kī tarah aa

tū kuchh to mire zabt-e-mohabbat kā sila de
hañgām-e-fanā dīda-e-pur-nam kī tarah aa

tu phul ki manind na shabnam ki tarah aa
ab ke kisi be-nam se mausam ki tarah aa

har martaba aata hai mah-e-nau ki tarah tu
is bar zara meri shab-e-gham ki tarah aa

hal karne hain mujh ko kai pechida masail
ai jaan-e-wafa gesu-e-pur-KHam ki tarah aa

zaKHmon ko gawara nahin yak-rangi-e-haalat
nashtar ki tarah aa kabhi marham ki tarah aa

nazdiki o duri ki kashakash ko miTa de
is jang mein tu sulh ke parcham ki tarah aa

mana ki mera ghar teri jannat to nahin hai
duniya mein meri laghzish-e-adam ki tarah aa

tu kuchh to mere zabt-e-mohabbat ka sila de
hangam-e-fana dida-e-pur-nam ki tarah aa

RECITATIONS Nomaan Shauque



00:00/00:00 tu phul ki manind na shabnam ki tarah aa Nomaan Shauque