ye qissa vo nahīñ tum jis ko qissa-ḳhvāñ se suno
mire fasāna-e-ġham ko mirī zabāñ se suno

sunāo dard-e-dil apnā to dam-ba-dam fariyād
misāl-e-nai mirī har ek ustuḳhvāñ se suno

karo hazār sitam le ke zikr kyā yak yaar
shikāyat apnī tum is apne nīm-jāñ se suno

ḳhudā ke vāste ai hamdamo na bolo tum
payām laayā hai kyā nāma-bar vahāñ se suno

tumhāre ishq ne rusvā kiyā jahāñ meñ hameñ
hamārā zikr na tum kyūñki ik jahāñ se suno

suno tum apnī jo teġh-e-nigāh ke ausāf
jo tum ko sunñā ho us shoḳh-e-dil-sitāñ se suno

'zafar' vo bosa to kyā degā par koī dushnām
jo tum ko sunñā ho us shoḳh-e-dil-sitāñ se suno

ye qissa wo nahin tum jis ko qissa-KHwan se suno
mere fasana-e-gham ko meri zaban se suno

sunao dard-e-dil apna to dam-ba-dam fariyaad
misal-e-nai meri har ek ustuKHwan se suno

karo hazar sitam le ke zikr kya yak yar
shikayat apni tum is apne nim-jaan se suno

KHuda ke waste ai hamdamo na bolo tum
payam laya hai kya nama-bar wahan se suno

tumhaare ishq ne ruswa kiya jahan mein hamein
hamara zikr na tum kyunki ek jahan se suno

suno tum apni jo tegh-e-nigah ke ausaf
jo tum ko sunna ho us shoKH-e-dil-sitan se suno

'zafar' wo bosa to kya dega par koi dushnam
jo tum ko sunna ho us shoKH-e-dil-sitan se suno

RECITATIONS Nomaan Shauque



00:00/00:00 ye qissa wo nahin tum jis ko qissa-KHwan se suno Nomaan Shauque

Source: Dewan-e-Markaz