yuuñ shab-e-hijr terī yaad aa.ī
duur bajtī ho jaise shahnā.ī

aap apnī hañsī uḌātā huuñ
ḳhud tamāsha huuñ ḳhud-tamāshā.ī

jab zamāne ne saath chhoḌ diyā
apnī dīvāngī hī kaam aa.ī

kal junūñ kā mazāq uḌātī thī
ab junūñ se ḳhajil hai dānā.ī

aa.ina dil kā chuur chuur huā
aur āvāz tak nahīñ aa.ī

kitnā iThlā ke chal rahī hai sabā
terā paiġhām to nahīñ laa.ī

shā.iroñ meñ shumār ho jis se
mujh meñ vo baat abhī nahīñ aa.ī

yun shab-e-hijr teri yaad aai
dur bajti ho jaise shahnai

aap apni hansi uData hun
KHud tamasha hun KHud-tamashai

jab zamane ne sath chhoD diya
apni diwangi hi kaam aai

kal junun ka mazaq uDati thi
ab junun se KHajil hai danai

aaina dil ka chur chur hua
aur aawaz tak nahin aai

kitna iThla ke chal rahi hai saba
tera paigham to nahin lai

shairon mein shumar ho jis se
mujh mein wo baat abhi nahin aai

Source: Qindeel