Subscribe to our newsletter and get our newest updates

Jameel Malik

  • Ghazal


lakh ehsas tera kushta-e-haalat rahe


laakh ehsās terā kushta-e-hālāt rahe
tire hoñToñ pe shagufta sī koī baat rahe

tū ne har daur meñ ulTī hai bisāt-e-ālam
aaj ye āḳhirī baazī bhī tire baat rahe

ye bhī milnā hai ki bas mil ke bichhaḌ jaate haiñ
lutf to jab hai ki ik umr mulāqāt rahe

kā.enāt un ke liye ek sarāb ek ḳhayāl
jo nigahbān-e-haram mahv-e-ġham-e-zāt rahe

yuuñ sar-e-bazm koī naġhma-e-jāved sunā
ki tire ba.ad bhī mahfil meñ tirī baat rahe

kyā ajab ek hī manzil ho hamārī ai dost
raah kaT jā.egī donoñ kā agar saat rahe

apnā sheva ki jalāte haiñ añdheroñ meñ charāġh
un kī sāzish ki zamāne meñ yūñhī raat rahe

jo lagāte rahe har haal pe jaañ kī baazī
kyuuñ 'jamīl' un ke muqaddar meñ faqat baat rahe

lakh ehsas tera kushta-e-haalat rahe
tere honTon pe shagufta si koi baat rahe

tu ne har daur mein ulTi hai bisat-e-alam
aaj ye aaKHiri bazi bhi tere baat rahe

ye bhi milna hai ki bas mil ke bichhaD jate hain
lutf to jab hai ki ek umr mulaqat rahe

kaenat un ke liye ek sarab ek KHayal
jo nigahban-e-haram mahw-e-gham-e-zat rahe

yun sar-e-bazm koi naghma-e-jawed suna
ki tere baad bhi mahfil mein teri baat rahe

kya ajab ek hi manzil ho hamari ai dost
rah kaT jaegi donon ka agar sat rahe

apna shewa ki jalate hain andheron mein charagh
un ki sazish ki zamane mein yunhi raat rahe

jo lagate rahe har haal pe jaan ki bazi
kyun 'jamil' un ke muqaddar mein faqat baat rahe


Leave a comment

+