Subscribe to our newsletter and get our newest updates

Gautam Rajrishi

  • Ghazal


dekh kar wahshat nigahon ki zaban bechain hai


dekh kar vahshat nigāhoñ kī zabāñ bechain hai
phir sulagne ko koī ik dāstāñ bechain hai

kaalī rātoñ ke salīqe din ko kyuuñ bhāne lage
soch kar gum-sum hai dhartī āsmāñ bechain hai

kāġhazoñ par ho ga.e saare ḳhulāse hī magar
kuchh to hai jo hāshiyoñ ke darmiyāñ bechain hai

jab se sāzish meñ samundar kī havā shāmil huī
kashtī hai chup-chāp sī aur bādbāñ bechain hai

bhed jab sargoshiyoñ kā khul ke aayā sāmne
shor vo uTThā hai apnā hukmarāñ bechain hai

hijr ke mausam kī kuchh mat pūchhiye uf dāstāñ
maiñ yahāñ betāb huuñ to vo vahāñ bechain hai

dekh kar wahshat nigahon ki zaban bechain hai
phir sulagne ko koi ek dastan bechain hai

kali raaton ke saliqe din ko kyun bhane lage
soch kar gum-sum hai dharti aasman bechain hai

kaghazon par ho gae sare KHulase hi magar
kuchh to hai jo hashiyon ke darmiyan bechain hai

jab se sazish mein samundar ki hawa shamil hui
kashti hai chup-chap si aur baadban bechain hai

bhed jab sargoshiyon ka khul ke aaya samne
shor wo uTTha hai apna hukmaran bechain hai

hijr ke mausam ki kuchh mat puchhiye uf dastan
main yahan betab hun to wo wahan bechain hai


Source: Deewan-e-habeeb

Leave a comment

+