apnī rusvā.ī kā ehsās to ab kuchh bhī nahīñ
hoñT hī sun haiñ ḳhamoshī kā sabab kuchh bhī nahīñ

ye ujāloñ ke jazīre ye sarāboñ ke dayār
sehr-o-afsūñ ke sivā jashn-e-tarab kuchh bhī nahīñ

bah ga.e vaqt ke sailāb meñ jismoñ ke suhāg
ab na vo chashm na ruḳhsār na lab kuchh bhī nahīñ

reza reza hai kisī ḳhvāb-e-zar-afshāñ kā tilism
fasl-e-gul anjum-o-mahtāb ye sab kuchh bhī nahīñ

mere aañsū inheñ karte haiñ ujāgar kuchh aur
pahle jo log sabhī kuchh the aur ab kuchh bhī nahīñ

ham pe to sub.h se raushan thī ye shām-e-be-kaif
tum ko is shaam se andāza-e-shab kuchh bhī nahīñ

shahr-e-dil shahr-e-ḳhamoshāñ kī tarah hai gunjān
kitnā ābād magar shor-o-shaġhab kuchh bhī nahīñ

ye jahāñ ālam-e-asbāb hai nādāñ na bano
kaun mānegā tabāhī kā sabab kuchh bhī nahīñ

rañg-o-bū gul se mukar jaa.eñ to rahtā kyā hai
aag bujh jaa.e to sūraj kā laqab kuchh bhī nahīñ

ḳhol hī ḳhol hai nau-ḳhez dabistān-e-ḳhayāl
shor hī shor hai taḳhlīq-e-adab kuchh bhī nahīñ

gum raho gum ki yahāñ jurm hai iz.hār-e-kamāl
chup raho chup ki yahāñ nām-o-nasab kuchh bhī nahīñ

merī taḳhrīb se yāroñ kā bhalā kyā hogā
merī pūñjī to ba-juz zauq-e-adab kuchh bhī nahīñ

us taraf vā hai dar-e-rahmat-e-yazdāñ 'dānish'
is taraf vus.at-e-dāmān-e-talab kuchh bhī nahīñ

apni ruswai ka ehsas to ab kuchh bhi nahin
honT hi sun hain KHamoshi ka sabab kuchh bhi nahin

ye ujalon ke jazire ye sarabon ke dayar
sehr-o-afsun ke siwa jashn-e-tarab kuchh bhi nahin

bah gae waqt ke sailab mein jismon ke suhag
ab na wo chashm na ruKHsar na lab kuchh bhi nahin

reza reza hai kisi KHwab-e-zar-afshan ka tilism
fasl-e-gul anjum-o-mahtab ye sab kuchh bhi nahin

mere aansu inhen karte hain ujagar kuchh aur
pahle jo log sabhi kuchh the aur ab kuchh bhi nahin

hum pe to subh se raushan thi ye sham-e-be-kaif
tum ko is sham se andaza-e-shab kuchh bhi nahin

shahr-e-dil shahr-e-KHamoshan ki tarah hai gunjaan
kitna aabaad magar shor-o-shaghab kuchh bhi nahin

ye jahan aalam-e-asbab hai nadan na bano
kaun manega tabahi ka sabab kuchh bhi nahin

rang-o-bu gul se mukar jaen to rahta kya hai
aag bujh jae to suraj ka laqab kuchh bhi nahin

KHol hi KHol hai nau-KHez dabistan-e-KHayal
shor hi shor hai taKHliq-e-adab kuchh bhi nahin

gum raho gum ki yahan jurm hai izhaar-e-kamal
chup raho chup ki yahan nam-o-nasab kuchh bhi nahin

meri taKHrib se yaron ka bhala kya hoga
meri punji to ba-juz zauq-e-adab kuchh bhi nahin

us taraf wa hai dar-e-rahmat-e-yazdan 'danish'
is taraf wusat-e-daman-e-talab kuchh bhi nahin