Subscribe to our newsletter and get our newest updates

Nadeem Sirsivi

  • Ghazal


jab baDha dard ki maujon ka dabaw sahab


jab baḌhā dard kī maujoñ kā dabāv sāhab
merī sāñsoñ kī larazne lagī naav sāhab

is se baḌh kar nahīñ afsurda-mizājī kā ilaaj
dil agar ro.e to auroñ ko hañsāo sāhab

ghup añdhere meñ ugātā huuñ suḳhan kā sūraj
be-sabab thoḌī hai rātoñ se lagāv sāhab

jab nahīñ miltī na.e zaḳhm kī sauġhāt mujhe
chhīl detā huuñ purānā koī ghaav sāhab

jis kī dānā.ī ne mansūḳh kiye hosh-o-havās
aise nādān pe patthar na uThāo sāhab

maiñ ne us husn-e-mujassam kī ziyārat kī hai
merī āñkhoñ ke zarā daam lagāo sāhab

bijliyāñ vasl kī sāñsoñ pe girāo sāhab
ruḳh se bhīgī huī zulfoñ ko haTāo sāhab

jaise sahrāoñ meñ milte haiñ do pyāse dariyā
hoñT se hoñT kuchh is tarah milāo sāhab

dil mohabbat kī saqāfat kā azal se hai amiiñ
is shahanshāh ko nafrat na sikhāo sāhab

jiit kar jashn manānā to huī aam sī baat
haar kar bhī to kabhī jashn manāo sāhab

ham na.e ahd ke suqrāt haiñ is baar hameñ
zahr kā pyāla nahīñ jaam pilāo sāhab

jab baDha dard ki maujon ka dabaw sahab
meri sanson ki larazne lagi naw sahab

is se baDh kar nahin afsurda-mizaji ka ilaj
dil agar roe to auron ko hansao sahab

ghup andhere mein ugata hun suKHan ka suraj
be-sabab thoDi hai raaton se lagaw sahab

jab nahin milti nae zaKHm ki saughat mujhe
chhil deta hun purana koi ghaw sahab

jis ki danai ne mansuKH kiye hosh-o-hawas
aise nadan pe patthar na uThao sahab

main ne us husn-e-mujassam ki ziyarat ki hai
meri aankhon ke zara dam lagao sahab

bijliyan wasl ki sanson pe girao sahab
ruKH se bhigi hui zulfon ko haTao sahab

jaise sahraon mein milte hain do pyase dariya
honT se honT kuchh is tarah milao sahab

dil mohabbat ki saqafat ka azal se hai amin
is shahanshah ko nafrat na sikhao sahab

jit kar jashn manana to hui aam si baat
haar kar bhi to kabhi jashn manao sahab

hum nae ahd ke suqraat hain is bar hamein
zahr ka pyala nahin jam pilao sahab


Source: Book : Pakistani Adab (Pg. 607) Author : Dr. Rashid Amjad Publication : Pakistan Academy of Letters, Islambad, Pakistan (2009) Edition : 2009

Leave a comment

+