Subscribe to our newsletter and get our newest updates

Najma Shaheen Khosa

  • Ghazal


dil ko zara qarar tha wo bhi nahin raha


dil ko zarā qarār thā vo bhī nahīñ rahā
āñkhoñ ko intizār thā vo bhī nahīñ rahā

vo saath thā to saath meñ merī bhī zaat thī
merā kahīñ shumār thaa, vo bhī nahīñ rahā

us se hue judā to phir ḳhud ko bhī kho diyā
ḳhud par jo e'tibār thā vo bhī nahīñ rahā

dāman meñ koī chāñd, sitāra na āftāb
jugnū par inhisār thā vo bhī nahīñ rahā

jhelī thiiñ jis ke sañg hī ye ranjisheñ kabhī
ik dal hī ġham-gusār thā vo bhī nahīñ rahā

uljhā thā mere dil meñ jo muddat se ik savāl
lab par jo baar baar thā vo bhī nahīñ rahā

jis par charāġh roz jalātī thī raat ko
dil meñ jo ik mazār thā vo bhī nahīñ rahā

muddat se us kī raah meñ dil thā bichhā huā
sochoñ meñ vasl-e-yār thā vo bhī nahīñ rahā

taqdīr kī asiir huuñ jis ke liye ye dil
muddat se ashk-bār thā vo bhī nahīñ rahā

ma.abūd mere merā muqaddar tū dekh le
ḳhud par jo iḳhtiyār thā vo bhī nahīñ rahā

dil ko zara qarar tha wo bhi nahin raha
aankhon ko intizar tha wo bhi nahin raha

wo sath tha to sath mein meri bhi zat thi
mera kahin shumar tha, wo bhi nahin raha

us se hue juda to phir KHud ko bhi kho diya
KHud par jo e'tibar tha wo bhi nahin raha

daman mein koi chand, sitara na aaftab
jugnu par inhisar tha wo bhi nahin raha

jheli thin jis ke sang hi ye ranjishen kabhi
ek dal hi gham-gusar tha wo bhi nahin raha

uljha tha mere dil mein jo muddat se ek sawal
lab par jo bar bar tha wo bhi nahin raha

jis par charagh roz jalati thi raat ko
dil mein jo ek mazar tha wo bhi nahin raha

muddat se us ki rah mein dil tha bichha hua
sochon mein wasl-e-yar tha wo bhi nahin raha

taqdir ki asir hun jis ke liye ye dil
muddat se ashk-bar tha wo bhi nahin raha

mabud mere mera muqaddar tu dekh le
KHud par jo iKHtiyar tha wo bhi nahin raha


Source: Book : Fanoos (Pg. 13) Author : Abbas Dana Publication : Shahid Book Depot Stedum Road Noor Nagar Rakhyal Ahmdabad (1993) Edition : 1993

Leave a comment

+