ghar hai patthar kā ḳhudā ḳhair kare
ab mire sar kā ḳhudā ḳhair kare

pyaas ne toḌ dī hai saarī hadeñ
ab samundar kā ḳhudā ḳhair kare

roz dīvāroñ ke bāham jhagḌe
aise meñ ghar kā ḳhudā ḳhair kare

har zabāñ teġh har ik haath chhurī
aaj manzar kā ḳhudā ḳhair kare

shīsh-mahloñ kī numā.ish hai 'azīz'
sañg-e-marmar kā ḳhudā ḳhair kare

ghar hai patthar ka KHuda KHair kare
ab mere sar ka KHuda KHair kare

pyas ne toD di hai sari haden
ab samundar ka KHuda KHair kare

roz diwaron ke baham jhagDe
aise mein ghar ka KHuda KHair kare

har zaban tegh har ek hath chhuri
aaj manzar ka KHuda KHair kare

shish-mahlon ki numaish hai 'aziz'
sang-e-marmar ka KHuda KHair kare