in ke ruḳh par hijāb rahtā hai
jaise mah par sahāb rahtā hai

vasl kā jab savāl ho un se
bas ''nahīñ'' meñ javāb rahtā hai

paas rah kar bhī darmiyāñ apne
fāsla be-hisāb rahtā hai

husn vāloñ se jo vafā chāhe
us kā ḳhāna ḳharāb rahtā hai

ham-safar sohnī sī ho koī
mere ḳhuuñ meñ chanāb rahtā hai

misl-e-tā.er havā meñ uḌtā huuñ
merī āñkhoñ meñ ḳhvāb rahtā hai

reg-e-sahrā unheñ nigaltī hai
jin kī rah meñ sarāb rahtā hai

maañ kī jis ko duā.eñ mil jaa.eñ
umr bhar kāmyāb rahtā hai

jaane kis ḳhaak se banā huuñ maiñ
ruuh meñ iztirāb rahtā hai

uljhe rishtoñ kī talḳh uljhan meñ
uljhā uljhā 'sahāb' rahtā hai

in ke ruKH par hijab rahta hai
jaise mah par sahab rahta hai

wasl ka jab sawal ho un se
bas nahin mein jawab rahta hai

pas rah kar bhi darmiyan apne
fasla be-hisab rahta hai

husn walon se jo wafa chahe
us ka KHana KHarab rahta hai

ham-safar sohni si ho koi
mere KHun mein chanab rahta hai

misl-e-taer hawa mein uDta hun
meri aankhon mein KHwab rahta hai

reg-e-sahra unhen nigalti hai
jin ki rah mein sarab rahta hai

man ki jis ko duaen mil jaen
umr bhar kaamyab rahta hai

jaane kis KHak se bana hun main
ruh mein iztirab rahta hai

uljhe rishton ki talKH uljhan mein
uljha uljha 'sahab' rahta hai

Source: Book : Funoon (Monthly) (Pg. 389) Author : Ahmad Nadeem Qasmi Publication : 4 Maklood Road, Lahore (Edition Nov. Dec. 1985,Issue No. 23) Edition : Edition Nov. Dec. 1985,Issue No. 23