Subscribe to our newsletter and get our newest updates

Haidar Ali Aatish

  • Ghazal


aaina-KHana karenge dil-e-nakaam ko hum


ā.ina-ḳhāna kareñge dil-e-nākām ko ham
phereñge apnī taraf rū-e-dil-ārām ko ham

shaam se sub.h talak daur-e-sharāb āḳhir hai
rote haiñ dekh ke ḳhandāñ dahan-e-jām ko ham

yaad rakhne kī jagah hai ye tilism-e-hairat
sub.h ko dekhte hī bhuul ga.e shaam ko ham

aañkh vo fitna-e-daurāñ kise dikhlātā hai
sho.abada jānte haiñ gardish-e-ayyām ko ham

fitna-añgezī bhī chhuptī hai kahīñ parde meñ
sunte haiñ gabr o musalmāñ se tire naam ko ham

ḳhūn-e-qāsid to vo saffāk samajhtā hai halāl
kisī ġhammāz se bhejvā.eñge paiġhām ko ham

paañv pakḌe haiñ zamīñ ne ye tire kūcha kī
rah-e-sad-sāla samajhte haiñ ab ik gaam ko ham

dīda-e-yār kaheñ kyā use kaif-e-mai meñ
bhuun kar roz gazak karte haiñ bādām ko ham

beza-e-ḳhat se huī us kī kudūrat dah-chand
ab safā.ī ke liye DhūñDeñge hajjām ko ham

yahī tahsīl-e-mohabbat kā hai aalam tā-hāl
puḳhta karte haiñ hanūz ārzū-e-ḳhām ko ham

lutf hāsil ho jo zulfoñ meñ giraftārī kā
mol leñ dil kī asīrī ke liye daam ko ham

kūcha-e-yār meñ apnā jo guzar hotā hai
nigarāñ rahte haiñ hasrat se dar-o-bām ko ham

husn se ishq kī ḳhātir hai ḳhudā ne bhejā
karte haiñ 'ātish' use aa.e haiñ jis kaam ko ham

aaina-KHana karenge dil-e-nakaam ko hum
pherenge apni taraf ru-e-dil-aram ko hum

sham se subh talak daur-e-sharab aaKHir hai
rote hain dekh ke KHandan dahan-e-jam ko hum

yaad rakhne ki jagah hai ye tilism-e-hairat
subh ko dekhte hi bhul gae sham ko hum

aankh wo fitna-e-dauran kise dikhlata hai
shoabada jaante hain gardish-e-ayyam ko hum

fitna-angezi bhi chhupti hai kahin parde mein
sunte hain gabr o musalman se tere nam ko hum

KHun-e-qasid to wo saffak samajhta hai halal
kisi ghammaz se bhejwaenge paigham ko hum

panw pakDe hain zamin ne ye tere kucha ki
rah-e-sad-sala samajhte hain ab ek gam ko hum

dida-e-yar kahen kya use kaif-e-mai mein
bhun kar roz gazak karte hain baadam ko hum

beza-e-KHat se hui us ki kudurat dah-chand
ab safai ke liye DhunDenge hajjam ko hum

yahi tahsil-e-mohabbat ka hai aalam ta-haal
puKHta karte hain hanuz aarzu-e-KHam ko hum

lutf hasil ho jo zulfon mein giraftari ka
mol len dil ki asiri ke liye dam ko hum

kucha-e-yar mein apna jo guzar hota hai
nigaran rahte hain hasrat se dar-o-baam ko hum

husn se ishq ki KHatir hai KHuda ne bheja
karte hain 'atish' use aae hain jis kaam ko hum


Source: Book : Aazadi ke baad dehli men urdu gazal (Pg. 300)

Leave a comment

+