Subscribe to our newsletter and get our newest updates

Hakeem Manzoor

  • Ghazal


hai iztirab har ek rang ko bikharne ka


hai iztirāb har ik rañg ko bikharne kā
ki āftāb nahīñ raat bhar Thaharne kā

mujassame kī tarah mausamoñ ko sahtā hai
vo muntazir hai koī hādsa guzarne kā

laTakte sūkhte ye naqsh yūñhī ro.eñge
guzar gayā hai jo mausam thā rañg bharne kā

vo aa.ine se agar ho gayā hai be-parvā
javāz kyā hai use phir kisī se Darne kā

giregī kal bhī yahī dhuup aur yahī shabnam
is āsmāñ se nahīñ aur kuchh utarne kā

ab aag aag hai niile pahāḌ kā manzar
hameñ thā shauq bahut us ke paar utarne kā

agarche us kī har ik baat khurdurī hai bahut
mujhe pasand hai Dhañg us ke baat karne kā

diyā hai jis ne bhī chup kā sharāp lafzoñ ko
use ḳhabar hai nahīñ lafz koī marne kā

hameñ ḳhabar hai hamāre safar kī ai 'manzūr'
kaheñge ham hī na hai rāstā sañvarne kā

hai iztirab har ek rang ko bikharne ka
ki aaftab nahin raat bhar Thaharne ka

mujassame ki tarah mausamon ko sahta hai
wo muntazir hai koi hadsa guzarne ka

laTakte sukhte ye naqsh yunhi roenge
guzar gaya hai jo mausam tha rang bharne ka

wo aaine se agar ho gaya hai be-parwa
jawaz kya hai use phir kisi se Darne ka

giregi kal bhi yahi dhup aur yahi shabnam
is aasman se nahin aur kuchh utarne ka

ab aag aag hai nile pahaD ka manzar
hamein tha shauq bahut us ke par utarne ka

agarche us ki har ek baat khurduri hai bahut
mujhe pasand hai Dhang us ke baat karne ka

diya hai jis ne bhi chup ka sharap lafzon ko
use KHabar hai nahin lafz koi marne ka

hamein KHabar hai hamare safar ki ai 'manzur'
kahenge hum hi na hai rasta sanwarne ka


Leave a comment

+