Subscribe to our newsletter and get our newest updates

Kaifi Azmi

  • Ghazal


shor yunhi na parindon ne machaya hoga


shor yūñhī na parindoñ ne machāyā hogā
koī jañgal kī taraf shahr se aayā hogā

peḌ ke kāTne vāloñ ko ye mālūm to thā
jism jal jā.eñge jab sar pe na saaya hogā

bānī-e-jashn-e-bahārāñ ne ye sochā bhī nahīñ
kis ne kāñToñ ko lahū apnā pilāyā hogā

bijlī ke taar pe baiThā huā hañstā panchhī
sochtā hai ki vo jañgal to parāyā hogā

apne jañgal se jo ghabrā ke uḌe the pyāse
har sarāb un ko samundar nazar aayā hogā

shor yunhi na parindon ne machaya hoga
koi jangal ki taraf shahr se aaya hoga

peD ke kaTne walon ko ye malum to tha
jism jal jaenge jab sar pe na saya hoga

bani-e-jashn-e-bahaaran ne ye socha bhi nahin
kis ne kanTon ko lahu apna pilaya hoga

bijli ke tar pe baiTha hua hansta panchhi
sochta hai ki wo jangal to paraya hoga

apne jangal se jo ghabra ke uDe the pyase
har sarab un ko samundar nazar aaya hoga

RECITATIONS Nomaan Shauque



00:00/00:00 shor yunhi na parindon ne machaya hoga Nomaan Shauque

Leave a comment

+