apnī aur kisī se kis din rāh-o-rasm-o-rifāqat thī
aatī jaatī saañs thī jis kī saa.at sañgat thī

tujh ko ḳhayāl na aayā varna kis din itne garāñ the ham
ik do harf-e-muravvat socho kaun sī aisī qīmat thī

maiñ bhī apnī dhun meñ ravāñ thā vo bhī apne-āp meñ gum
baat kī naubat kaise aatī kis ko itnī fursat thī

biit chuke vo din vo zamāne rāhat bharī aziyyat ke
yaad kise ab kaun batā.e duurī thī ki vo qurbat thī

kūcha kūcha phaileñ bāteñ qat.a-e-ta.alluq-ḳhātir kī
auroñ kā to zikr hī kyā dīvār-o-dar ko hairat thī

kitne haiñ jo ab tak pahuñche apnī zaat kī manzil tak
harf-o-bayāñ se baat hai bāhar aisī kaḌī masāfat thī

gosha-gīr faqīr the ham to maslak ijz-o-niyāz 'bashīr'
kyuuñ be-sūd kisī se ulajhte apnī kis se adāvat thī

apni aur kisi se kis din rah-o-rasm-o-rifaqat thi
aati jati sans thi jis ki saat sangat thi

tujh ko KHayal na aaya warna kis din itne garan the hum
ek do harf-e-murawwat socho kaun si aisi qimat thi

main bhi apni dhun mein rawan tha wo bhi apne-ap mein gum
baat ki naubat kaise aati kis ko itni fursat thi

bit chuke wo din wo zamane rahat bhari aziyyat ke
yaad kise ab kaun batae duri thi ki wo qurbat thi

kucha kucha phailen baaten qata-e-talluq-KHatir ki
auron ka to zikr hi kya diwar-o-dar ko hairat thi

kitne hain jo ab tak pahunche apni zat ki manzil tak
harf-o-bayan se baat hai bahar aisi kaDi masafat thi

gosha-gir faqir the hum to maslak ijz-o-niyaz 'bashir'
kyun be-sud kisi se ulajhte apni kis se adawat thi

Source: Book : Kitab-e-Rafta (Pg. 209) Author : Firasat Rizvi Publication : Academy Bazyaft, Karachi Pakistan Lahore (2007) Edition : 2007