Subscribe to our newsletter and get our newest updates

Iftikhar Arif

  • Ghazal


sitaron se bhara ye aasman kaisa lagega


sitāroñ se bharā ye āsmāñ kaisā lagegā
hamāre ba.ad tum ko ye jahāñ kaisā lagegā

thake-hāre hue sūraj kī bhīgī raushnī meñ
havāoñ se ulajhtā bādbāñ kaisā lagegā

jame qadmoñ ke nīche se phisaltī jā.egī ret
bikhar jā.egī jab umr-e-ravāñ kaisā lagegā

isī miTTī meñ mil jā.egī pūñjī umr bhar kī
giregī jis ghaḌī dīvār-e-jāñ kaisā lagegā

bahut itrā rahe ho dil kī baazī jītne par
ziyāñ ba.ad az ziyāñ ba.ad az ziyāñ kaisā lagegā

vo jis ke ba.ad hogī ik musalsal be-niyāzī
ghaḌī bhar kā vo sab shor o fuġhāñ kaisā lagegā

abhī se kyā batā.eñ marg-e-majnūñ kī ḳhabar par
sulūk-e-kūcha-e-nā-mehrbāñ kaisā lagegā

batāo to sahī ai jān-e-jāñ kaisā lagegā
sitāroñ se bharā ye āsmāñ kaisā lagegā

sitaron se bhara ye aasman kaisa lagega
hamare baad tum ko ye jahan kaisa lagega

thake-haare hue suraj ki bhigi raushni mein
hawaon se ulajhta baadban kaisa lagega

jame qadmon ke niche se phisalti jaegi ret
bikhar jaegi jab umr-e-rawan kaisa lagega

isi miTTi mein mil jaegi punji umr bhar ki
giregi jis ghaDi diwar-e-jaan kaisa lagega

bahut itra rahe ho dil ki bazi jitne par
ziyan baad az ziyan baad az ziyan kaisa lagega

wo jis ke baad hogi ek musalsal be-niyazi
ghaDi bhar ka wo sab shor o fughan kaisa lagega

abhi se kya bataen marg-e-majnun ki KHabar par
suluk-e-kucha-e-na-mehrban kaisa lagega

batao to sahi ai jaan-e-jaan kaisa lagega
sitaron se bhara ye aasman kaisa lagega

RECITATIONS Iftikhar Arif



00:00/00:00 sitaron se bhara ye aasman kaisa lagega Iftikhar Arif

Leave a comment

+