vaah kyā daur hai kyā log haiñ kyā hotā hai
ye bhī mat kah ki jo kahiye to gilā hotā hai

kyā batā.eñ tumheñ ab kyā nahīñ hotā hai yahāñ
bas ye jaano ki jo hotā hai burā hotā hai

de ke dukh auroñ ko vo kaun sā sukh pā.egā
aisī bātoñ se bhalā kis kā bhalā hotā hai

ab vo din duur nahīñ dekhnā tum bhī yaaro
amn ke naam pe kyā fitna bapā hotā hai

phir saf-ārā huiiñ faujeñ lab-e-dariyā-e-furāt
ham ko ma.alūm hai is jañg meñ kyā hotā hai

aaj phir dil meñ uThā hai vahī derīna savāl
aise mazlūmoñ kā kyā koī ḳhudā hotā hai

ik zarā haal to dekho mirā ai dost mire
tum hī socho koī aise meñ ḳhafā hotā hai

yuuñ to har raat hī rahtī hai ajab bechainī
aaj kuchh dard mire dil meñ sivā hotā hai

wah kya daur hai kya log hain kya hota hai
ye bhi mat kah ki jo kahiye to gila hota hai

kya bataen tumhein ab kya nahin hota hai yahan
bas ye jaano ki jo hota hai bura hota hai

de ke dukh auron ko wo kaun sa sukh paega
aisi baaton se bhala kis ka bhala hota hai

ab wo din dur nahin dekhna tum bhi yaro
amn ke nam pe kya fitna bapa hota hai

phir saf-ara huin faujen lab-e-dariya-e-furaat
hum ko malum hai is jang mein kya hota hai

aaj phir dil mein uTha hai wahi derina sawal
aise mazlumon ka kya koi KHuda hota hai

ek zara haal to dekho mera ai dost mere
tum hi socho koi aise mein KHafa hota hai

yun to har raat hi rahti hai ajab bechaini
aaj kuchh dard mere dil mein siwa hota hai

Source: Book : Harf Harf Khowab (Pg. 89) Author : asi ramnagari Publication : Nasim Pathara Po. Moghalsarai (Varansi) (1992) Edition : 1992