mizāj-e-sahal-talab apnā ruḳhsateñ māñge
sabāt-e-fan magar ai dil azīmateñ māñge
ufuq pe husn-e-adā ke tulū-e-mehr-e-ḳhayāl
fazā-e-sher sahar kī latāfateñ māñge
musir hai aql ki mantiq meñ aa.e uqda-e-jāñ
qadam qadam pe magar dil bashārateñ māñge
na.ī uḌaan ko kam haiñ ye zauq ke shahpar
na.ī havāoñ kā har ḳham zihānateñ māñge
shu.ūr ke qad-o-qāmat pe hai nazar kis kī
ye farba-chashm zamāna jasāmateñ māñge
nafīs o sahl nahīñ vaz-e-sher kī tadrīj
har ek soch digar-gūñ sī hālateñ māñge
sukūn-e-tūl-e-vafā hai talab kī kotāhī
ki lams-e-yād dhaḌaktī jasārateñ māñge
shuā-e-mehr se dhul jaa.eñ jaise maah o najm
tirā ḳhayāl anokhī tahārateñ māñge
na pūchh 'sāz' ko vo to sarāb vāloñ se
phire hai kāsa-e-dil meñ haqīqateñ māñge
mizaj-e-sahal-talab apna ruKHsaten mange
sabaat-e-fan magar ai dil azimaten mange
ufuq pe husn-e-ada ke tulu-e-mehr-e-KHayal
faza-e-sher sahar ki latafaten mange
musir hai aql ki mantiq mein aae uqda-e-jaan
qadam qadam pe magar dil bashaaraten mange
nai uDan ko kam hain ye zauq ke shahpar
nai hawaon ka har KHam zihanaten mange
shuur ke qad-o-qamat pe hai nazar kis ki
ye farba-chashm zamana jasamaten mange
nafis o sahl nahin waz-e-sher ki tadrij
har ek soch digar-gun si haalaten mange
sukun-e-tul-e-wafa hai talab ki kotahi
ki lams-e-yaad dhaDakti jasaraten mange
shua-e-mehr se dhul jaen jaise mah o najm
tera KHayal anokhi tahaaraten mange
na puchh 'saz' ko wo to sarab walon se
phire hai kasa-e-dil mein haqiqaten mange
RECITATIONS
Abdul Ahad Saaz
00:00/00:00
mizaj-e-sahal-talab apna ruKHsaten mange
Abdul Ahad Saaz
Source: Rooh-e-Ghazal,Pachas Sala Intekhab
Leave a comment