dukh siine meñ kis tāqat-e-īzā ne bhare haiñ
ghar saikaḌoñ ḳhālī hue vīrāne bhare haiñ

hairat hai ki jo garden-e-qātil pe rahā hai
us ḳhuun se ḳhud haath masīhā ne bhare haiñ

pyāsoñ kī tasallī ke liye shor bahut hai
kuchh kūzoñ ke nuqsān bhī dariyā ne bhare haiñ

ḳhār-o-ḳhas-o-ḳhāshāk tasarruf meñ haiñ kis ke
ye apne hī dāman haiñ jo sahrā ne bhare haiñ

kuchh der hī guzrī hai jale mash.al-e-gul ko
ye kyā ki dhuveñ se sabhī ḳhas-ḳhāne bhare haiñ

yūñhī to nahīñ zinda o bedār ye tasvīr
har naqsh meñ rañg apnī tamannā ne bhare haiñ

ik vus.at-e-dil hai ġham-e-imroz se labrez
jo goshe tahī the ġham-e-fardā ne bhare haiñ

kyuuñ uljhe ho 'mahshar' ye tavaqqo hī ġhalat hai
zaḳhm-e-ġham-e-duniyā kabhī duniyā ne bhare haiñ

dukh sine mein kis taqat-e-iza ne bhare hain
ghar saikaDon KHali hue virane bhare hain

hairat hai ki jo garden-e-qatil pe raha hai
us KHun se KHud hath masiha ne bhare hain

pyason ki tasalli ke liye shor bahut hai
kuchh kuzon ke nuqsan bhi dariya ne bhare hain

KHar-o-KHas-o-KHashak tasarruf mein hain kis ke
ye apne hi daman hain jo sahra ne bhare hain

kuchh der hi guzri hai jale mashal-e-gul ko
ye kya ki dhuwen se sabhi KHas-KHane bhare hain

yunhi to nahin zinda o bedar ye taswir
har naqsh mein rang apni tamanna ne bhare hain

ek wusat-e-dil hai gham-e-imroz se labrez
jo goshe tahi the gham-e-farda ne bhare hain

kyun uljhe ho 'mahshar' ye tawaqqo hi ghalat hai
zaKHm-e-gham-e-duniya kabhi duniya ne bhare hain