kabhī duā to kabhī bad-duā se laḌte hue
tamām umr guzārī havā se laḌte hue

hue na zer kisī intihā se laḌte hue
mahāz haar ga.e ham qazā se laḌte hue

bikhar rahā huuñ fazā meñ ġhubār kī sūrat
ḳhilāf-e-maslahat apnī anā se laḌte hue

fazā badalte hī jaag uTThī fitrat-e-mai-kash
shikast khā ga.ī tauba ghaTā se laḌte hue

qalam kī nok se bahtā rahā lahū merā
hisār-e-ḳhilqat-e-fikr-e-rasā se laḌte hue

junūñ navard ko manzar na koī raas aayā
marā to shoḳhi-e-āb-o-havā se laḌte hue

pahuñch sake na kisī ḳhush-gavār manzil tak
tumhārī yaad kī zanjīr-e-pā se laḌte hue

unhīñ pe band huā irtiqā kā darvāza
fanā hue haiñ jo apnī baqā se laḌte hue

'zafar' ghire to usī razm-e-gāh-e-hastī meñ
hue shahīd saf-e-karbalā se laḌte hue

kabhi dua to kabhi bad-dua se laDte hue
tamam umr guzari hawa se laDte hue

hue na zer kisi intiha se laDte hue
mahaz haar gae hum qaza se laDte hue

bikhar raha hun faza mein ghubar ki surat
KHilaf-e-maslahat apni ana se laDte hue

faza badalte hi jag uTThi fitrat-e-mai-kash
shikast kha gai tauba ghaTa se laDte hue

qalam ki nok se bahta raha lahu mera
hisar-e-KHilqat-e-fikr-e-rasa se laDte hue

junun naward ko manzar na koi ras aaya
mara to shoKHi-e-ab-o-hawa se laDte hue

pahunch sake na kisi KHush-gawar manzil tak
tumhaari yaad ki zanjir-e-pa se laDte hue

unhin pe band hua irtiqa ka darwaza
fana hue hain jo apni baqa se laDte hue

'zafar' ghire to usi razm-e-gah-e-hasti mein
hue shahid saf-e-karbala se laDte hue