Subscribe to our newsletter and get our newest updates

Abbas Ali Khan Bekhud

  • Ghazal


maza aata kisi surat agar tark-e-wafa hota


mazā aatā kisī sūrat agar tark-e-vafā hotā
tumhārī tarah maiñ bhī be-vafā hotā to kyā hotā

musībat ho ga.ī āḳhir tamannā kī giraftārī
agar be-mudda.ā hotā to banda bhī ḳhudā hotā

ye shān-e-be-niyāzī hai ḳhudā ma.alūm hotā hai
ḳhudā ma.alūm kyā hotā agar vo but ḳhudā hotā

na rahtā yuuñ pareshāñ raat din maiñ fikr-e-darmāñ meñ
jo mujh ko dard denā thā to be-darmāñ diyā hotā

hamārī nā-umīdī kā to hai ilzām qismat par
tumhārā mudda.ā hotā to manzūr-e-ḳhudā hotā hotā

kisī ke paas dil hotā to sharh-e-dard-e-dil karte
ye hasrat rah ga.ī ham ko koī dard-āshnā hotā

azal se soḳhta-sāmāñ huuñ fikr-e-āshiyāñ kyā ho
na girtī barq to ye soz-e-dil se jal gayā hotā

na mujh se iltijā hotī na ḳhud vo mehrbāñ hote
guzar hotā bhī un kī bazm meñ apnā to kyā hotā

dam-e-āḳhir marīz-e-ġham ḳhudā ma.alūm kyā kahtā
na hote mehrbāñ sun kar magar sun to liyā hotā

hamārī be-kasī bhī ik na ik din kaam aa jaatī
agar 'beḳhud' koī ham be-kasoñ kā bhī ḳhudā hotā

maza aata kisi surat agar tark-e-wafa hota
tumhaari tarah main bhi be-wafa hota to kya hota

musibat ho gai aaKHir tamanna ki giraftari
agar be-muddaa hota to banda bhi KHuda hota

ye shan-e-be-niyazi hai KHuda malum hota hai
KHuda malum kya hota agar wo but KHuda hota

na rahta yun pareshan raat din main fikr-e-darman mein
jo mujh ko dard dena tha to be-darman diya hota

hamari na-umidi ka to hai ilzam qismat par
tumhaara muddaa hota to manzur-e-KHuda hota hota

kisi ke pas dil hota to sharh-e-dard-e-dil karte
ye hasrat rah gai hum ko koi dard-ashna hota

azal se soKHta-saman hun fikr-e-ashiyan kya ho
na girti barq to ye soz-e-dil se jal gaya hota

na mujh se iltija hoti na KHud wo mehrban hote
guzar hota bhi un ki bazm mein apna to kya hota

dam-e-aKHir mariz-e-gham KHuda malum kya kahta
na hote mehrban sun kar magar sun to liya hota

hamari be-kasi bhi ek na ek din kaam aa jati
agar 'beKHud' koi hum be-kason ka bhi KHuda hota


Leave a comment

+