Subscribe to our newsletter and get our newest updates

Najeeb Ahmad

  • Ghazal


andhe badan mein ye sahar-asar kaun hai


andhe badan meñ ye sahar-āsār kaun hai
tū bhī nahīñ to mujh meñ sharar-bār kaun hai

vo kaun hai jo jāgtā hai merī niiñd meñ
asrār maiñ huuñ sāhab-e-asrār kaun hai

kis ne vafā ke naam pe dhokā diyā mujhe
kis se kahūñ ki merā gunahgār kaun hai

sab ne gale lagā ke gale se judā kiyā
pahchān hī nahīñ ki riyā-kār kaun hai

phir yuuñ huā ki mujh pe hī dīvār gir paḌī
lekin na khul sakā pas-e-dīvār kaun hai

merī sadā meñ kis kī sadā.eñ haiñ maujzan
naddī huuñ maiñ agar to mire paar kaun hai

mahbūs sab haiñ maslahatoñ ke hisār meñ
lekin ḳhud apnī dhun kā giraftār kaun hai

har aañkh meñ 'najīb' haiñ sapne base hue
is jāgte dayār meñ bedār kaun hai

andhe badan mein ye sahar-asar kaun hai
tu bhi nahin to mujh mein sharar-bar kaun hai

wo kaun hai jo jagta hai meri nind mein
asrar main hun sahab-e-asrar kaun hai

kis ne wafa ke nam pe dhoka diya mujhe
kis se kahun ki mera gunahgar kaun hai

sab ne gale laga ke gale se juda kiya
pahchan hi nahin ki riya-kar kaun hai

phir yun hua ki mujh pe hi diwar gir paDi
lekin na khul saka pas-e-diwar kaun hai

meri sada mein kis ki sadaen hain maujzan
naddi hun main agar to mere par kaun hai

mahbus sab hain maslahaton ke hisar mein
lekin KHud apni dhun ka giraftar kaun hai

har aankh mein 'najib' hain sapne base hue
is jagte dayar mein bedar kaun hai


Leave a comment

+