Subscribe to our newsletter and get our newest updates

Dagh Dehlvi

  • Ghazal


kaun sa tair-e-gum-gashta use yaad aaya


kaun sā tā.ir-e-gum-gashta use yaad aayā
dekhtā bhāltā har shāḳh ko sayyād aayā

mere qaabū meñ na pahroñ dil-e-nāshād aayā
vo mirā bhūlne vaalā jo mujhe yaad aayā

koī bhūlā huā andāz-e-sitam yaad aayā
ki tabassum tujhe zālim dam-e-be-dād aayā

laa.e haiñ log janāze kī tarah mahshar meñ
kis musībat se tirā kushta-e-bedād aayā

jazb-e-vahshat tire qurbān tirā kyā kahnā
khiñch ke rag rag meñ mire nashtar-e-fassād aayā

us ke jalve ko ġharaz kaun-o-makāñ se kyā thā
daad lene ke liye husn-e-ḳhudā-dād aayā

bastiyoñ se yahī āvāz chalī aatī hai
jo kiyā tū ne vo aage tire farhād aayā

dil-e-vīrāñ se raqīboñ ne murādeñ pā.īñ
kaam kis kis ke mirā ḳhirman-e-barbād aayā

ishq ke aate hī muñh par mire phūlī hai basant
ho gayā zard ye shāgird jab ustād aayā

ho gayā farz mujhe shauq kā daftar likhnā
jab mire haath koī ḳhāma-e-faulād aayā

iid hai qatl mirā ahl-e-tamāshā ke liye
sab gale milne lage jab ki vo jallād aayā

chain karte haiñ vahāñ ranj uThāne vaale
kaam uqbā meñ hamārā dil-e-nāshād aayā

dī shab-e-vasl mo.azzin ne azaañ pichhlī raat
haa.e kam-baḳht ko kis vaqt ḳhudā yaad aayā

mere naale ne sunā.ī hai kharī kis kis ko
muñh farishtoñ pe ye gustāḳh ye āzād aayā

ġham-e-jāved ne dī mujh ko mubārakbādī
jab sunā ye ki unheñ sheva-e-bedād aayā

maiñ tamannā-e-shahādat kā mazā bhuul gayā
aaj is shauq se armān se jallād aayā

shādiyāna jo diyā naala o shevan ne diyā
jab mulāqāt ko nāshād kī nāshād aayā

lījiye suniye ab afsāna-e-furqat mujh se
aap ne yaad dilāyā to mujhe yaad aayā

aap kī bazm meñ sab kuchh hai magar 'dāġh' nahīñ
ham ko vo ḳhāna-ḳharāb aaj bahut yaad aayā

kaun sa tair-e-gum-gashta use yaad aaya
dekhta bhaalta har shaKH ko sayyaad aaya

mere qabu mein na pahron dil-e-nashad aaya
wo mera bhulne wala jo mujhe yaad aaya

koi bhula hua andaz-e-sitam yaad aaya
ki tabassum tujhe zalim dam-e-be-dad aaya

lae hain log janaze ki tarah mahshar mein
kis musibat se tera kushta-e-bedad aaya

jazb-e-wahshat tere qurban tera kya kahna
khinch ke rag rag mein mere nashtar-e-fassad aaya

us ke jalwe ko gharaz kaun-o-makan se kya tha
dad lene ke liye husn-e-KHuda-dad aaya

bastiyon se yahi aawaz chali aati hai
jo kiya tu ne wo aage tere farhad aaya

dil-e-viran se raqibon ne muraden pain
kaam kis kis ke mera KHirman-e-barbaad aaya

ishq ke aate hi munh par mere phuli hai basant
ho gaya zard ye shagird jab ustad aaya

ho gaya farz mujhe shauq ka daftar likhna
jab mere hath koi KHama-e-faulad aaya

id hai qatl mera ahl-e-tamasha ke liye
sab gale milne lage jab ki wo jallad aaya

chain karte hain wahan ranj uThane wale
kaam uqba mein hamara dil-e-nashad aaya

di shab-e-wasl moazzin ne azan pichhli raat
hae kam-baKHt ko kis waqt KHuda yaad aaya

mere nale ne sunai hai khari kis kis ko
munh farishton pe ye gustaKH ye aazad aaya

gham-e-jawed ne di mujh ko mubarakbaadi
jab suna ye ki unhen shewa-e-bedad aaya

main tamanna-e-shahadat ka maza bhul gaya
aaj is shauq se arman se jallad aaya

shadiyana jo diya nala o shewan ne diya
jab mulaqat ko nashad ki nashad aaya

lijiye suniye ab afsana-e-furqat mujh se
aap ne yaad dilaya to mujhe yaad aaya

aap ki bazm mein sab kuchh hai magar 'dagh' nahin
hum ko wo KHana-KHarab aaj bahut yaad aaya

Videos
This video is playing from YouTube Videos
This video is playing from YouTube Mukhtar Begum Mukhtar Begum

Source: Book : Kalam-e-aizaz afzal (Pg. 146) Author : Aizaz Afzal Publication : Usmania Book Depot

Leave a comment

+