mohabbat ko gale kā haar bhī karte nahīñ bantā
kuchh aisī baat hai inkār bhī karte nahīñ bantā

ḳhulūs-e-nāz kī tauhīn bhī dekhī nahīñ jaatī
shu.ūr-e-husn ko bedār bhī karte nahīñ bantā

tujhe ab kyā kaheñ ai mehrbāñ apnā hī ronā hai
ki saarī zindagī īsār bhī karte nahīñ bantā

sitam dekho ki us be-dard se apnī laḌā.ī hai
jise sharminda-e-paikār bhī karte nahīñ bantā

adā ranjīdagī parvāngī āñsū-bharī āñkheñ
ab itnī sādgī kyā pyaar bhī karte nahīñ bantā

javānī mehrbānī husn bhī achchhī musībat hai
use achchhā use bīmār bhī karte nahīñ bantā

bhañvar se jī bhī ghabrātā hai lekin kyā kiyā jaa.e
tavāf-e-mauj-e-kam-raftār bhī karte nahīñ bantā

isī dil ko bharī duniyā ke jhagḌe jhelne Thahre
yahī dil jis ko duniyā-dār bhī karte nahīñ bantā

jalātī hai diloñ ko sard-mehrī bhī zamāne kī
savāl-e-garmī-e-bāzār bhī karte nahīñ bantā

'ḳhizāñ' un kī tavajjoh aisī nā-mumkin nahīñ lekin
zarā sī baat par isrār bhī karte nahīñ bantā

mohabbat ko gale ka haar bhi karte nahin banta
kuchh aisi baat hai inkar bhi karte nahin banta

KHulus-e-naz ki tauhin bhi dekhi nahin jati
shuur-e-husn ko bedar bhi karte nahin banta

tujhe ab kya kahen ai mehrban apna hi rona hai
ki sari zindagi isar bhi karte nahin banta

sitam dekho ki us be-dard se apni laDai hai
jise sharminda-e-paikar bhi karte nahin banta

ada ranjidagi parwangi aansu-bhari aankhen
ab itni sadgi kya pyar bhi karte nahin banta

jawani mehrbani husn bhi achchhi musibat hai
use achchha use bimar bhi karte nahin banta

bhanwar se ji bhi ghabraata hai lekin kya kiya jae
tawaf-e-mauj-e-kam-raftar bhi karte nahin banta

isi dil ko bhari duniya ke jhagDe jhelne Thahre
yahi dil jis ko duniya-dar bhi karte nahin banta

jalati hai dilon ko sard-mehri bhi zamane ki
sawal-e-garmi-e-bazar bhi karte nahin banta

'KHizan' un ki tawajjoh aisi na-mumkin nahin lekin
zara si baat par israr bhi karte nahin banta

Source: akeli-bastiyan