nasīb apnā zarā aazmā ke dekheñge
charāġh-e-shauq havā meñ jalā ke dekheñge
machal machal ke kahāñ tak ye barq girtī hai
chaman meñ phir se nasheman banā ke dekheñge
falak ko zid hai ki ham ko rulā ke dekhegā
hameñ ye zid hai use muskurā ke dekheñge
jhukā.e baiThe haiñ ab un ke dar pe sar apnā
kabhī to vo hameñ āñkheñ uThā ke dekheñge
mile sakūñ dil-e-muztar ko vo jagah hai kahāñ
jahān-e-ġham se bhī ham duur jā ke dekheñge
vo bach ke jā.eñge kab tak nazar se ai 'āfat'
ham apne dil meñ ab un ko basā ke dekheñge
nasib apna zara aazma ke dekhenge
charagh-e-shauq hawa mein jala ke dekhenge
machal machal ke kahan tak ye barq girti hai
chaman mein phir se nasheman bana ke dekhenge
falak ko zid hai ki hum ko rula ke dekhega
hamein ye zid hai use muskura ke dekhenge
jhukae baiThe hain ab un ke dar pe sar apna
kabhi to wo hamein aankhen uTha ke dekhenge
mile sakun dil-e-muztar ko wo jagah hai kahan
jahan-e-gham se bhi hum dur ja ke dekhenge
wo bach ke jaenge kab tak nazar se ai 'afat'
hum apne dil mein ab un ko basa ke dekhenge
Leave a comment