Subscribe to our newsletter and get our newest updates

Bashir Saifi

  • Ghazal


KHud apna eatibar ganwata raha hun main


ḳhud apnā e.atibār gañvātā rahā huuñ maiñ
zarre ko āftāb batātā rahā huuñ maiñ

andhī havā ko duuñ koī ilzām kis liye
apne diye ko aap bujhātā rahā huuñ maiñ

ik umr ke riyāz kā hāsil na pūchhiye
reg-e-ravāñ pe naqsh banātā rahā huuñ maiñ

har chand maslahat kā taqāzā kuchh aur thā
ā.īna har kisī ko dikhātā rahā huuñ maiñ

bachchoñ ke hañste-khelte chehroñ kī oT meñ
apne dukhoñ kī Tiis chhupātā rahā huuñ maiñ

ye aur baat ḳhud mire paañv na uTh sake
auroñ ko rāsta to dikhātā rahā huuñ maiñ

'saifī' fishār-e-ġham kī tamāzat ke bāvajūd
hairat hai apnī baat nibhātā rahūñ maiñ

KHud apna eatibar ganwata raha hun main
zarre ko aaftab batata raha hun main

andhi hawa ko dun koi ilzam kis liye
apne diye ko aap bujhata raha hun main

ek umr ke riyaz ka hasil na puchhiye
reg-e-rawan pe naqsh banata raha hun main

har chand maslahat ka taqaza kuchh aur tha
aaina har kisi ko dikhata raha hun main

bachchon ke hanste-khelte chehron ki oT mein
apne dukhon ki Tis chhupata raha hun main

ye aur baat KHud mere panw na uTh sake
auron ko rasta to dikhata raha hun main

'saifi' fishaar-e-gham ki tamazat ke bawajud
hairat hai apni baat nibhata rahun main


Leave a comment

+