Subscribe to our newsletter and get our newest updates

Ehtimam Sadiq

  • Ghazal


ye hasraten bhi meri saiyan nikali jaen


ye hasrateñ bhī mirī sā.iyāñ nikālī jaa.eñ
ki dasht hī kī taraf khiḌkiyāñ nikālī jaa.eñ

bahār guzrī qafas hī meñ hāv-hū karte
ḳhizāoñ meñ to mirī beḌiyāñ nikālī jaa.eñ

ye shaam kaafī nahīñ hai siyah-libāsī ko
shafaq se aur zarā surḳhiyāñ nikālī jaa.eñ

to bach raheñgī barahna badan kī sauġhāteñ
mohabbatoñ se agar dūriyāñ nikālī jaa.eñ

mire jalā.e diyoñ kā bhī kuchh ḳhayāl rahe
jo is makāñ se kabhī khiḌkiyāñ nikālī jaa.eñ

ye kaisī zid hai ki pahle badan se jaañ nikle
phir us ke ba.ad sabhī siskiyāñ nikālī jaa.eñ

to tum bhī merī tarah laḌkhaḌāne lag jaao
agar tumhārī bhī baisākhiyāñ nikālī jaa.eñ

ye ḳhūñ-bahā bhī adā kar chukī hai ḳhvāboñ kā
to merī aañkh se ab kirchiyāñ nikālī jaa.eñ

nikal paḌegā mirā sar bhī saath hī 'sādiq'
jo mere sar se kabhī pagḌiyāñ nikālī jaa.eñ

ye hasraten bhi meri saiyan nikali jaen
ki dasht hi ki taraf khiDkiyan nikali jaen

bahaar guzri qafas hi mein haw-hu karte
KHizaon mein to meri beDiyan nikali jaen

ye sham kafi nahin hai siyah-libasi ko
shafaq se aur zara surKHiyan nikali jaen

to bach rahengi barahna badan ki saughaten
mohabbaton se agar duriyan nikali jaen

mere jalae diyon ka bhi kuchh KHayal rahe
jo is makan se kabhi khiDkiyan nikali jaen

ye kaisi zid hai ki pahle badan se jaan nikle
phir us ke baad sabhi siskiyan nikali jaen

to tum bhi meri tarah laDkhaDane lag jao
agar tumhaari bhi baisakhiyan nikali jaen

ye KHun-baha bhi ada kar chuki hai KHwabon ka
to meri aankh se ab kirchiyan nikali jaen

nikal paDega mera sar bhi sath hi 'sadiq'
jo mere sar se kabhi pagDiyan nikali jaen


Source: Husn-e-sukhan

Leave a comment

+