āḳhir-e-kār chale tiir kī raftār qadam
ġhair manzil na paḌe raah meñ zinhār qadam

uTh ga.e vasl kī shab peshtar-az-yār qadam
aage ham umr-e-ravāñ se bhī chale chaar qadam

kū-e-maqsūd se yuuñ rakhtī hai ġhaflat mujhe duur
jaise so jaane se ho jaate haiñ be-kār qadam

ahl-e-ālam meñ huuñ maiñ zindoñ meñ murdoñ kī tarah
baḌh chaleñ laakh magar saath haiñ do chaar qadam

ek muddat se rah-e-kāba meñ āvāra haiñ
kyā ḳhudā kā mujhe dikhlā.eñge dīdār qadam

josh-e-vahshat meñ bhī maiñ chaḌh ke na us par dauḌā
le ga.e hasrat-e-ḳhār-e-sar-e-dīvār qadam

sūrat-e-barg-e-ḳhizāñ jhaḌte haiñ har gaam gunāh
jab uThāte haiñ tirī raah meñ zavvār qadam

ai junūñ koh-o-bayābān bhī dikhlā mujh ko
raheñ pastī o bulandī se ḳhabar-dār qadam

kūcha-gardī ye shab-o-roz kī be-vaj.h nahīñ
eḌiyāñ ragḌeñge kis ke pas-e-dīvār qadam

jāda-e-rāh-e-mohabbat ko ḳhat-e-mustar jaan
sar ke bal misl-e-qadam chal jo hoñ be-kār qadam

ḳhaak bhī huuñ to huuñ ḳhāk-e-dar us kā 'ātish'
jis ke the dosh-e-payambar ke sazā-vār qadam

aaKHir-e-kar chale tir ki raftar qadam
ghair manzil na paDe rah mein zinhaar qadam

uTh gae wasl ki shab peshtar-az-yar qadam
aage hum umr-e-rawan se bhi chale chaar qadam

ku-e-maqsud se yun rakhti hai ghaflat mujhe dur
jaise so jaane se ho jate hain be-kar qadam

ahl-e-alam mein hun main zindon mein murdon ki tarah
baDh chalen lakh magar sath hain do chaar qadam

ek muddat se rah-e-kaba mein aawara hain
kya KHuda ka mujhe dikhlaenge didar qadam

josh-e-wahshat mein bhi main chaDh ke na us par dauDa
le gae hasrat-e-KHar-e-sar-e-diwar qadam

surat-e-barg-e-KHizan jhaDte hain har gam gunah
jab uThate hain teri rah mein zawwar qadam

ai junun koh-o-bayaban bhi dikhla mujh ko
rahen pasti o bulandi se KHabar-dar qadam

kucha-gardi ye shab-o-roz ki be-wajh nahin
eDiyan ragDenge kis ke pas-e-diwar qadam

jada-e-rah-e-mohabbat ko KHat-e-mustar jaan
sar ke bal misl-e-qadam chal jo hon be-kar qadam

KHak bhi hun to hun KHak-e-dar us ka 'atish'
jis ke the dosh-e-payambar ke saza-war qadam

Source: Rooh-e-Ghazal,Pachas Sala Intekhab