Subscribe to our newsletter and get our newest updates

Deepti Mishra

  • Ghazal


be-had bechaini hai lekin maqsad zahir kuchh bhi nahin


be-had bechainī hai lekin maqsad zāhir kuchh bhī nahīñ
paanā khonā hañsnā ronā kyā hai āḳhir kuchh bhī nahīñ

apnī apnī qismat sab kī apnā apnā hissa hai
jism kī ḳhātir lākhoñ sāmāñ ruuh kī ḳhātir kuchh bhī nahīñ

us kī baazī us ke mohre us kī chāleñ us kī jiit
us ke aage saare qādir māhir shātir kuchh bhī nahīñ

us kā honā yā nā honā ḳhud meñ ujāgar hotā hai
gar vo hai to bhītar hī hai varna ba-zāhir kuchh bhī nahīñ

duniyā se jo paayā us ne duniyā hī ko sauñp diyā
ġhazleñ nazmeñ duniyā kī haiñ kyā hai shā.ir kuchh bhī nahīñ

be-had bechaini hai lekin maqsad zahir kuchh bhi nahin
pana khona hansna rona kya hai aaKHir kuchh bhi nahin

apni apni qismat sab ki apna apna hissa hai
jism ki KHatir lakhon saman ruh ki KHatir kuchh bhi nahin

us ki bazi us ke mohre us ki chaalen us ki jit
us ke aage sare qadir mahir shatir kuchh bhi nahin

us ka hona ya na hona KHud mein ujagar hota hai
gar wo hai to bhitar hi hai warna ba-zahir kuchh bhi nahin

duniya se jo paya us ne duniya hi ko saunp diya
ghazlen nazmen duniya ki hain kya hai shair kuchh bhi nahin


Leave a comment

+