yūñhī gar har saañs meñ thoḌī kamī ho jā.egī
ḳhatm rafta rafta ik din zindagī ho jā.egī

dekhne vaale faqat tasvīr-e-zāhir par na jā
har nafas ke saath duniyā dūsrī ho jā.egī

gar yahī fasl-e-junūñ-zā hai yahī abr-e-bahār
azmat-e-tauba nisār-e-mai-kashī ho jā.egī

marg-e-be-hañgām kahte haiñ jise aaj ahl-e-dard
kal yahī sūrat badal kar zindagī ho jā.egī

zikr hai zindāñ meñ vo gulzār par bijlī girī
aaj mere āshiyāñ meñ raushnī ho jā.egī

sajda gāh-e-ām par sajde se kuchh hāsil nahīñ
muft ālūda jabīn-e-bandagī ho jā.egī

ḳhatm hai shab chehra-e-mashriq se uThtī hai naqāb
dam-zadan meñ raushnī hī raushnī ho jā.egī

muttasil haiñ zof o quvvat kī hadeñ haañ hoshyār
varna is tark-e-ḳhudī meñ ḳhud-kushī ho jā.egī

zaḳhm bhī taaza hai aur dil bhī nahīñ mānūs-e-dard
rafta rafta yūñhī aadat sabr kī ho jā.egī

sham.a sā jab shaam hī se hai gudāz-e-dil 'ravāñ'
sub.h tak kyā jaane kyā hālat tirī ho jā.egī

yunhi gar har sans mein thoDi kami ho jaegi
KHatm rafta rafta ek din zindagi ho jaegi

dekhne wale faqat taswir-e-zahir par na ja
har nafas ke sath duniya dusri ho jaegi

gar yahi fasl-e-junun-za hai yahi abr-e-bahaar
azmat-e-tauba nisar-e-mai-kashi ho jaegi

marg-e-be-hangam kahte hain jise aaj ahl-e-dard
kal yahi surat badal kar zindagi ho jaegi

zikr hai zindan mein wo gulzar par bijli giri
aaj mere aashiyan mein raushni ho jaegi

sajda gah-e-am par sajde se kuchh hasil nahin
muft aaluda jabin-e-bandagi ho jaegi

KHatm hai shab chehra-e-mashriq se uThti hai naqab
dam-zadan mein raushni hi raushni ho jaegi

muttasil hain zof o quwwat ki haden han hoshyar
warna is tark-e-KHudi mein KHud-kushi ho jaegi

zaKHm bhi taza hai aur dil bhi nahin manus-e-dard
rafta rafta yunhi aadat sabr ki ho jaegi

shama sa jab sham hi se hai gudaz-e-dil 'rawan'
subh tak kya jaane kya haalat teri ho jaegi

Source: Book : Sher-e-Aasman (Pg. 52) Author : Hakim Manzoor Publication : Maktaba aariz