Subscribe to our newsletter and get our newest updates

Jameela Khuda Bakhsh

  • Ghazal


fasl-e-gul dekh ke afzun hui wahshat apni


fasl-e-gul dekh ke afzūñ huī vahshat apnī
le chale dekhiye kis jā mujhe qismat apnī

go mujhe zo.af ne majbūr kiyā thā lekin
manzil-e-ishq meñ kaam aa ga.ī himmat apnī

tū hī insāf se kah de ki ye pardā kyā hai
kyuuñ chhupātā hai dikhā kar mujhe sūrat apnī

pūchhte kyā ho fidā jaan kiyā kyuuñ maiñ ne
ishq apnā hai dil apnā hai tabī.at apnī

mahv-e-nazzāra haiñ ham to kisī jānib chhup kar
aur vo ā.īne meñ dekhā kare sūrat apnī

rāhat-o-ranj kā ġhairoñ pe asar kyā hogā
rañj apnā hai alam apnā masarrat apnī

jaan jaa.e to chalī jaa.e magar ai qātil
tere kūche hī meñ ho jaa.e shahādat apnī

sar meñ saudā-e-havas aur takabbur na rahe
chashm-e-bātin se agar dekhe haqīqat apnī

tār-e-malbūs-e-ḳhudī kyuuñ raheñ baaqī mere
panja-e-dast-e-junūñ apnā hai vahshat apnī

mar hī jā.ūñ maiñ agar hijr meñ naale na karūñ
āh-o-zārī se nikal jaatī hai kulfat apnī

dil use de ke 'jamīla' maiñ abas kyuuñ rotā
us ne rakhne ko mujhe dī thī amānat apnī

fasl-e-gul dekh ke afzun hui wahshat apni
le chale dekhiye kis ja mujhe qismat apni

go mujhe zoaf ne majbur kiya tha lekin
manzil-e-ishq mein kaam aa gai himmat apni

tu hi insaf se kah de ki ye parda kya hai
kyun chhupata hai dikha kar mujhe surat apni

puchhte kya ho fida jaan kiya kyun main ne
ishq apna hai dil apna hai tabiat apni

mahw-e-nazzara hain hum to kisi jaanib chhup kar
aur wo aaine mein dekha kare surat apni

rahat-o-ranj ka ghairon pe asar kya hoga
ranj apna hai alam apna masarrat apni

jaan jae to chali jae magar ai qatil
tere kuche hi mein ho jae shahadat apni

sar mein sauda-e-hawas aur takabbur na rahe
chashm-e-baatin se agar dekhe haqiqat apni

tar-e-malbus-e-KHudi kyun rahen baqi mere
panja-e-dast-e-junun apna hai wahshat apni

mar hi jaun main agar hijr mein nale na karun
aah-o-zari se nikal jati hai kulfat apni

dil use de ke 'jamila' main abas kyun rota
us ne rakhne ko mujhe di thi amanat apni


Source: Book : Khushk Tahni Zard Pattay (Pg. 64) Author : Yousuf Taqi Publication : Yousuf Taqi (2003) Edition : 2003

Leave a comment

+