Subscribe to our newsletter and get our newest updates

Dinesh Kumar

  • Ghazal


main apne kaam agar waqt par nahin karta


maiñ apne kaam agar vaqt par nahīñ kartā
to kāmyābī kā parvat bhī sar nahīñ kartā

hasīn ḳhvāb agar dil meñ ghar nahīñ kartā
tavīl raat se maiñ dar-guzar nahīñ kartā

sikhā diyā hai mujhe ġham ne zindagī kā hunar
kisī bhī haal meñ ab aañkh tar nahīñ kartā

gire zamīn pe dastār sar ke jhukne se
maiñ hukmarāñ ko salām is qadar nahīñ kartā

maiñ apne azm kī patvār saath rakhtā huuñ
mire safīne pe tūfāñ asar nahīñ kartā

ġhurūr saath meñ chaltā hai har ghaḌī us ke
vo ab amiir hai tanhā safar nahīñ kartā

diyā umiid kā tū har ghaḌī jalā.e rakh
har ek raat kī kyā rab sahar nahīñ kartā

ajab javāb thā un kā 'dinesh' socheñge
sunā thā ishq koī soch kar nahīñ kartā

main apne kaam agar waqt par nahin karta
to kaamyabi ka parwat bhi sar nahin karta

hasin KHwab agar dil mein ghar nahin karta
tawil raat se main dar-guzar nahin karta

sikha diya hai mujhe gham ne zindagi ka hunar
kisi bhi haal mein ab aankh tar nahin karta

gire zamin pe dastar sar ke jhukne se
main hukmaran ko salam is qadar nahin karta

main apne azm ki patwar sath rakhta hun
mere safine pe tufan asar nahin karta

ghurur sath mein chalta hai har ghaDi us ke
wo ab amir hai tanha safar nahin karta

diya umid ka tu har ghaDi jalae rakh
har ek raat ki kya rab sahar nahin karta

ajab jawab tha un ka 'dinesh' sochenge
suna tha ishq koi soch kar nahin karta


Leave a comment

+