shab-e-furqat kī tanhā.ī kā lamha
ka.ī rāz-e-nihānī kholtā hai

bahut din se vo nā-mānūs lahja
mire dasht-e-anā meñ gūñjtā hai

mirī pahchān rishte merā maqsad
sadā sargoshiyoñ meñ pūchhtā hai

maiñ sargardāñ huuñ us kī justujū meñ
vo kahtā hai ki mujh ko DhūñDtā hai

hai us se khul ke milnā ab zarūrī
pas-e-parda jo mujh ko dekhtā hai

shab-e-furqat ki tanhai ka lamha
kai raaz-e-nihani kholta hai

bahut din se wo na-manus lahja
mere dasht-e-ana mein gunjta hai

meri pahchan rishte mera maqsad
sada sargoshiyon mein puchhta hai

main sargardan hun us ki justuju mein
wo kahta hai ki mujh ko DhunDta hai

hai us se khul ke milna ab zaruri
pas-e-parda jo mujh ko dekhta hai