Subscribe to our newsletter and get our newest updates

Nadeem Fazli

  • Ghazal


ab apni zat ka irfan hone wala hai


ab apnī zaat kā irfān hone vaalā hai
ḳhudā se rābta āsān hone vaalā hai

gañvā chukā huuñ maiñ chālīs saal jis ke liye
vo ek pal mirī pahchān hone vaalā hai

isī liye to jalātā huuñ āñdhiyoñ meñ charāġh
yaqīn hai ki nigahbān hone vaalā hai

ab apne zaḳhm nazar aa rahe haiñ phuul mujhe
shu.ūr-e-dard pashemān hone vaalā hai

mire liye tirī jānib se pyaar kā iz.hār
mire ġhurūr kā sāmān hone vaalā hai

ye choT hai mirī mushkil-pasand fitrat par
jo marhala thā ab āsān hone vaalā hai

agar ġhurūr hai sūraj ko apnī hiddat par
to phir ye qatra bhī tūfān hone vaalā hai

bahut uruuj pe ḳhush-fahmiyāñ haiñ ab us kī
vo an-qarīb pashemān hone vaalā hai

tū apnā haath mire haath meñ agar de de
to ye faqīr bhī sultān hone vaalā hai

charāġh-e-dār kī lau maañd paḌ rahī hai 'nadīm'
phir apne naam kā elaan hone vaalā hai

ab apni zat ka irfan hone wala hai
KHuda se rabta aasan hone wala hai

ganwa chuka hun main chaalis sal jis ke liye
wo ek pal meri pahchan hone wala hai

isi liye to jalata hun aandhiyon mein charagh
yaqin hai ki nigahban hone wala hai

ab apne zaKHm nazar aa rahe hain phul mujhe
shuur-e-dard pasheman hone wala hai

mere liye teri jaanib se pyar ka izhaar
mere ghurur ka saman hone wala hai

ye choT hai meri mushkil-pasand fitrat par
jo marhala tha ab aasan hone wala hai

agar ghurur hai suraj ko apni hiddat par
to phir ye qatra bhi tufan hone wala hai

bahut uruj pe KHush-fahmiyan hain ab us ki
wo an-qarib pasheman hone wala hai

tu apna hath mere hath mein agar de de
to ye faqir bhi sultan hone wala hai

charagh-e-dar ki lau mand paD rahi hai 'nadim'
phir apne nam ka elan hone wala hai


Leave a comment

+