Subscribe to our newsletter and get our newest updates

Ghulam Husain Sajid

  • Ghazal


main us pari ka agar muddaa nahin samjha


maiñ us parī kā agar mudda.ā nahīñ samjhā
samajh meñ kyā nahīñ aayā maiñ kyā nahīñ samjhā

yahī bahut hai ki is baar bhī maiñ dushman ko
burā samajhte hue bhī burā nahīñ samjhā

vo māntā hai mire iḳhtilāf ke haq ko
use biThāyā hai sar par ḳhudā nahīñ samjhā

charāġh-o-ā.ina hairān kyuuñ nahīñ hoñge
ki maiñ sabāhat-e-gul kī adā nahīñ samjhā

kisī bikharte hue ḳhvāb ke ta.āqub meñ
nikal paḌā huuñ magar rāsta nahīñ samjhā

bahut se rañj sahe apnī jaan par lekin
tire vajūd ko ḳhud se judā nahīñ samjhā

hazār maiñ ne har ik chiiz kī vazāhat kī
magar vo shaḳhs mirā mas.ala nahīñ samjhā

usī ne aag lagā.ī thī mere hāthoñ ko
jise maiñ bhuul se barg-e-hinā nahīñ samjhā

kisī kī uḌtī huī niiñd kī haqīqat ko
nagar meñ koī bhī mere sivā nahīñ samjhā

khaḌā huā thā kahīñ bām-e-arsh par 'sājid'
magar zamīn ko tahtus-surā nahīñ samjhā

main us pari ka agar muddaa nahin samjha
samajh mein kya nahin aaya main kya nahin samjha

yahi bahut hai ki is bar bhi main dushman ko
bura samajhte hue bhi bura nahin samjha

wo manta hai mere iKHtilaf ke haq ko
use biThaya hai sar par KHuda nahin samjha

charagh-o-aina hairan kyun nahin honge
ki main sabahat-e-gul ki ada nahin samjha

kisi bikharte hue KHwab ke taaqub mein
nikal paDa hun magar rasta nahin samjha

bahut se ranj sahe apni jaan par lekin
tere wajud ko KHud se juda nahin samjha

hazar main ne har ek chiz ki wazahat ki
magar wo shaKHs mera masala nahin samjha

usi ne aag lagai thi mere hathon ko
jise main bhul se barg-e-hina nahin samjha

kisi ki uDti hui nind ki haqiqat ko
nagar mein koi bhi mere siwa nahin samjha

khaDa hua tha kahin baam-e-arsh par 'sajid'
magar zamin ko tahtus-sura nahin samjha


Leave a comment

+