Subscribe to our newsletter and get our newest updates

Zafar Iqbal

  • Ghazal


khiDkiyan kis tarah ki hain aur dar kaisa hai wo


khiḌkiyāñ kis tarah kī haiñ aur dar kaisā hai vo
sochtā huuñ jis meñ vo rahtā hai ghar kaisā hai vo

kaisī vo āb-o-havā hai jis meñ vo letā hai saañs
aatā jaatā hai vo jis par rahguzar kaisā hai vo

kaun sī rañgat ke haiñ us ke zamīn-o-āsmāñ
chhāñv hai jis kī yahāñ tak bhī shajar kaisā hai vo

ik nazar meñ hī nazar aa jā.egā vo sar-ba-sar
phir bhī us ko dekhnā bār-e-digar kaisā hai vo

maiñ to us ke ek ik lamhe kā rakhtā huuñ shumār
aur mere hāl-e-dil se be-ḳhabar kaisā hai vo

us kā honā hī bahut hai vo kahīñ hai to sahī
kyā sarokār is se hai mujh ko 'zafar' kaisā hai vo

khiDkiyan kis tarah ki hain aur dar kaisa hai wo
sochta hun jis mein wo rahta hai ghar kaisa hai wo

kaisi wo aab-o-hawa hai jis mein wo leta hai sans
aata jata hai wo jis par rahguzar kaisa hai wo

kaun si rangat ke hain us ke zamin-o-asman
chhanw hai jis ki yahan tak bhi shajar kaisa hai wo

ek nazar mein hi nazar aa jaega wo sar-ba-sar
phir bhi us ko dekhna bar-e-digar kaisa hai wo

main to us ke ek ek lamhe ka rakhta hun shumar
aur mere haal-e-dil se be-KHabar kaisa hai wo

us ka hona hi bahut hai wo kahin hai to sahi
kya sarokar is se hai mujh ko 'zafar' kaisa hai wo


Source: kulliyaat-e-yagaana

Leave a comment

+