Subscribe to our newsletter and get our newest updates

Wajd Chughtai

  • Ghazal


dekhne mein ye kanch ka ghar hai


dekhne meñ ye kāñch kā ghar hai
raushnī aadmī ke andar hai

kaisā ujḌā huā ye manzar hai
ghar ke hote bhī koī be-ghar hai

misl-e-yūnus huuñ batn-e-māhī meñ
mere chāroñ taraf samundar hai

us ke kyā kyā sulūk dekhe haiñ
vaqt hī baḳht kā sikandar hai

dekhne meñ hai vo varaq saada
paḌhne baiThūñ to ek daftar hai

raushnī ho to koī pahchāne
kaun rahzan hai kaun rahbar hai

saañs lenā bhī mo.ajiza hai yahāñ
zindagī aag kā samundar hai

roz paḌhtā huuñ bhiiḌ ke chehre
sab ke chehre pe ek manzar hai

us kī tasvīr kis tarah khīñchūñ
merā mahbūb mere andar hai

apnī rūdād mujh ko yaad nahīñ
dil ko lekin tamām azbar hai

dekhne mein ye kanch ka ghar hai
raushni aadmi ke andar hai

kaisa ujDa hua ye manzar hai
ghar ke hote bhi koi be-ghar hai

misl-e-yunus hun batn-e-mahi mein
mere chaaron taraf samundar hai

us ke kya kya suluk dekhe hain
waqt hi baKHt ka sikandar hai

dekhne mein hai wo waraq sada
paDhne baiThun to ek daftar hai

raushni ho to koi pahchane
kaun rahzan hai kaun rahbar hai

sans lena bhi moajiza hai yahan
zindagi aag ka samundar hai

roz paDhta hun bhiD ke chehre
sab ke chehre pe ek manzar hai

us ki taswir kis tarah khinchun
mera mahbub mere andar hai

apni rudad mujh ko yaad nahin
dil ko lekin tamam azbar hai


Source: Book : Kulliyat-e-Rahi (Pg. 221) Author : Ghulam Murtaza Rahi Publication : Educational Publishing House (2012) Edition : 2012

Leave a comment

+