bulbul vo gul hai ḳhvāb meñ tū gā ke mat jagā
yā chuTkiyoñ kī ġhunchoñ se bajvā ke gat jagā

vo gul-ezār baaġh meñ aave jo rahm kar
kahte haiñ gul guloñ se kareñ aaj rat-jagā

hamdam vo bazla-sanj to aate hī so rahā
ḳhush-tab.iyoñ se bol ke bāham jagat jagā

tā-sub.h shaam se rahe majlis meñ daur-e-jām
saaqī hameñ jagā.e to bā-kaifiyat jagā

kaaTī hai bekalī se shab-e-hijr-e-gul-ruḳhāñ
Tuk aañkh lag ga.ī hai sabā ham ko mat jagā

hai mujh ko us kī nāzukī-e-tab.a se lihāz
duuñ varna āñkheñ paañv se mal kar turat jagā

farhād-o-qais chhoḌ ga.e kishvar-e-junūñ
naubat par apnī vaañ kī dilā saltanat jagā

bulbul wo gul hai KHwab mein tu ga ke mat jaga
ya chuTkiyon ki ghunchon se bajwa ke gat jaga

wo gul-ezar bagh mein aawe jo rahm kar
kahte hain gul gulon se karen aaj rat-jaga

hamdam wo bazla-sanj to aate hi so raha
KHush-tabiyon se bol ke baham jagat jaga

ta-subh sham se rahe majlis mein daur-e-jam
saqi hamein jagae to ba-kaifiyat jaga

kaTi hai bekali se shab-e-hijr-e-gul-ruKHan
Tuk aankh lag gai hai saba hum ko mat jaga

hai mujh ko us ki nazuki-e-taba se lihaz
dun warna aankhen panw se mal kar turat jaga

farhad-o-qais chhoD gae kishwar-e-junun
naubat par apni wan ki dila saltanat jaga