Subscribe to our newsletter and get our newest updates

Tanveer Ahmad Alvi

  • Ghazal


wo raqs kahan aur wo tab-o-tab kahan hai


vo raqs kahāñ aur vo tab-o-tāb kahāñ hai
vo sajda-e-shauq aur vo mehrāb kahāñ hai

hai ābla-pā.ī hī tirā naqsh-e-kaf-e-pā
sahrā-e-laq-o-daq hai yahāñ aab kahāñ hai

aurāq-e-dil-o-jāñ meñ haiñ kuchh daaġh hī baaqī
vo ishq-o-aqīdat kā hasīñ baab kahāñ hai

ik ashk-e-nadāmat ke sivā kuchh bhī nahīñ hai
palkoñ pe sajāyā huā vo ḳhvāb kahāñ hai

ab durd-e-tah-e-jām hai yā tishna-labī hai
sahbā vo kahāñ sāġhar-e-mahtāb kahāñ hai

kyā TuuT ga.e aap hī shabnam ke vo dhāge
vo pyaar kā resham dil-e-betāb kahāñ hai

'tanvīr' rah-e-zīst meñ tanhā ye safar kyuuñ
vo lutf kahāñ pursish-e-ahbāb kahāñ hai

wo raqs kahan aur wo tab-o-tab kahan hai
wo sajda-e-shauq aur wo mehrab kahan hai

hai aabla-pai hi tera naqsh-e-kaf-e-pa
sahra-e-laq-o-daq hai yahan aab kahan hai

auraq-e-dil-o-jaan mein hain kuchh dagh hi baqi
wo ishq-o-aqidat ka hasin bab kahan hai

ek ashk-e-nadamat ke siwa kuchh bhi nahin hai
palkon pe sajaya hua wo KHwab kahan hai

ab durd-e-tah-e-jam hai ya tishna-labi hai
sahba wo kahan saghar-e-mahtab kahan hai

kya TuT gae aap hi shabnam ke wo dhage
wo pyar ka resham dil-e-betab kahan hai

'tanwir' rah-e-zist mein tanha ye safar kyun
wo lutf kahan pursish-e-ahbab kahan hai


Leave a comment

+