kā.enāt-e-ārzū meñ ham basar karne lage
sab bahut nafrat se kyuuñ ham par nazar karne lage

tere har lamhe kā ham ne aaj tak rakkhā hisāb
ye alag hai baat ḳhud ko be-ḳhabar karne lage

zindagī ko alvidā.a kah kar chalā jā.ūñgā maiñ
jab mirī tanhā.ī mujh ko dar-ba-dar karne lage

mulk kī barbādiyāñ us vaqt tai ho jā.eñgī
jab burī tahzīb bachchoñ par asar karne lage

yā-ḳhudā rāh-e-vafā par rahbarī karnā merī
jab mujhe gumrāh merā ham-safar karne lage

chhoḌ kar us vaqt ohde ḳhud chalā jā.ūñgā maiñ
shak jahāñ koī mire īmān par karne lage

ishq ke us moḌ ko sab log kahte haiñ junūñ
dil kisī ko yaad jab shām-o-sahar karne lage

kaenat-e-arzu mein hum basar karne lage
sab bahut nafrat se kyun hum par nazar karne lage

tere har lamhe ka hum ne aaj tak rakkha hisab
ye alag hai baat KHud ko be-KHabar karne lage

zindagi ko alwidaa kah kar chala jaunga main
jab meri tanhai mujh ko dar-ba-dar karne lage

mulk ki barbaadiyan us waqt tai ho jaengi
jab buri tahzib bachchon par asar karne lage

ya-KHuda rah-e-wafa par rahbari karna meri
jab mujhe gumrah mera ham-safar karne lage

chhoD kar us waqt ohde KHud chala jaunga main
shak jahan koi mere iman par karne lage

ishq ke us moD ko sab log kahte hain junun
dil kisi ko yaad jab sham-o-sahar karne lage

Source: Book : Fanoos (Pg. 18) Author : Abbas Dana Publication : Shahid Book Depot Stedum Road Noor Nagar Rakhyal Ahmdabad (1993) Edition : 1993